സൗന്ദര്യം വർധിപ്പിക്കാൻ ഹെയർ സ്ട്രെയ്റ്റനിങ് ചെയ്തു; പിന്നാലെ പിടിപെട്ടത് വൃക്കരോ​ഗം

ടുണീഷ്യയിൽ സലൂണിൽ നിന്ന് ഹെയർ സ്ട്രെയ്റ്റനിങ് ചെയ്ത യുവതിക്ക് വൃക്കരോ​ഗം പിടിപെട്ടു. ഫ്രാൻസിൽ നിന്നുള്ള ഒരുകൂട്ടം ഡോക്ടർമാരാണ് ഈ വിവരം പുറത്ത് വിട്ടത്. തുടർ പരിശോധനയിൽ യുവതിയുടെ രക്തത്തിൽ ക്രിയാറ്റിനിന്റെ അളവ് അധികരിച്ചതായി കണ്ടെത്തിയെന്നും അത് വൃക്കയുടെ തകരാറിന്റെ ലക്ഷണമായിരുന്നുവെന്നും ഡോക്ടർമാർ പറഞ്ഞു. മൂത്രത്തിൽ രക്തത്തിന്റെ അംശം കാണുകയും ചെയ്തിരുന്നു.

മുമ്പ് ആരോ​ഗ്യപ്രശ്നങ്ങളൊന്നും യുവതിക്ക് ഉണ്ടായിരുന്നില്ല. 2020 ജൂണിലാണ് യുവതി സലൂണിൽ ഹെയർ സ്ട്രെയ്റ്റൻ ചെയ്യാനെത്തിയത്. 2021 ഏപ്രിലിലും 2022 ജൂലൈയിലും ചെയ്തു. ഓരോതവണ ​ഹെയർ ട്രീറ്റ്മെന്റ് കഴിഞ്ഞുവരുമ്പോഴും ഛർദി, വയറിളക്കം, പനി, പുറംവേദന തുടങ്ങിയവ അനുഭവപ്പെട്ടിരുന്നുവെന്ന് പെൺകുട്ടി പിന്നീട് വ്യക്തമാക്കി. സ്ട്രെയ്റ്റൻ ചെയ്യുന്നതിനിടെ ശിരോചർമത്തിൽ നീറ്റൽ അനുഭവപ്പെട്ടിരുന്നുവെന്നും കഴിഞ്ഞതിനുശേഷം മുറിവുകൾ രൂപപ്പെട്ടിരുന്നുവെന്നും പെൺകുട്ടി പറഞ്ഞു.

​ഗ്ലയോക്സിലിക് ആസിഡ് എന്ന കെമിക്കൽ അടങ്ങിയ സ്ട്രെയ്റ്റനിങ് ക്രീമാണ് യുവതിയിൽ ഉപയോ​ഗിച്ചിരുന്നത്. ഇതിനുപിന്നാലെ ​ഗ്ലയോക്സിലിക് ആസിഡും വൃക്കയുടെ തകരാറും സംബന്ധിച്ച ഡോക്ടർമാർ പഠനം നടത്തുകയും ചെയ്തു. എലികളിൽ നടത്തിയ പരീക്ഷണത്തിനൊടുവിൽ ​ഗ്ലയോക്സിലിക് ആസിഡ് ചർമത്തിലൂടെ വൃക്കയിൽ എത്തിയതാകാം പ്രശ്നമായതെന്ന് ഡോക്ടർമാർ കണ്ടെത്തി. ഗ്ലയോക്സിലിക് ആസിഡ് അടങ്ങിയ സൗന്ദര്യവർധക ഉത്പന്നങ്ങൾ ഉപയോ​ഗിക്കാതിരിക്കുന്നതും വിപണിയിൽ നിന്ന് ഒഴിവാക്കുകയും ചെയ്യുന്നതാണ് അഭികാമ്യമെന്നും ഡോക്ടർമാർ പറഞ്ഞു.

അടുത്തിടെ തൊലിവെളുക്കാനുള്ള വ്യാജക്രീമുകൾ ഉപയോ​ഗിച്ചതിനേത്തുടർന്ന് വൃക്കരോ​ഗമുണ്ടായ രണ്ടുപേരുടെ വാർത്ത റായ്​ഗഡിൽ നിന്നു പുറത്തുവന്നിരുന്നു. മലപ്പുറത്തും സമാന സംഭവത്തേത്തുടർന്ന് എട്ടുപേർക്ക് വൃക്കരോ​ഗം ബാധിച്ച വാർത്ത റിപ്പോർട്ട് ചെയ്തിരുന്നു.