വെനസ്വേലയുടെ വ്യോമമേഖല അടച്ചതായി കണക്കാക്കണം : ട്രംപ്

വാഷിങ്ടൺ ഡിസി : വെനസ്വേലയുടെ വ്യോമമേഖല അടച്ചതായി കണക്കാക്കണമെന്ന് അമേരിക്കൻ പ്രസിഡന്റ് ഡോണൾഡ് ട്രംപ്. മയക്കുമരുന്ന് കടത്ത് ആരോപിച്ച് വെനസ്വേലൻ പ്രസിഡന്റ് നിക്കോളാസ് മഡൂറോയെ വിദേശ ഭീകരസംഘടനയുടെ അംഗമായി പ്രഖ്യാപിച്ചതിനു പിന്നാലെയാണ് വ്യോമമേഖല അടച്ചതായി ട്രംപിന്റെ പ്രഖ്യാപനം. വെനസ്വേലയ്‌ക്കെതിരായ അമേരിക്കൻ സൈനിക നടപടിയുടെ മുന്നൊരുക്കമാണിതെന്നാണ് വിലയിരുത്തൽ. ട്രംപിന്റെ പ്രഖ്യാപനം കൊളോണിയലിസ്റ്റ് ഭീഷണിയാണെന്നും വെനസ്വേലയിലെ ജനതയ്‌ക്കെതിരായ നിയമവിരുദ്ധവും നീതികരിക്കാനാകാത്തതുമായ ആക്രമണമാണെന്നും വെനസ്വേലൻ വിദേശകാര്യമന്ത്രാലയം പ്രതികരിച്ചു.

വെനസ്വേലയ്ക്ക് മുകളിലൂടെ പറക്കുന്നത് അപകടകരമാണെന്ന് ട്രംപ് കഴിഞ്ഞയാഴ്ച മുന്നറിയിപ്പ് നൽകിയതിനെതുടർന്ന് സർവീസ് നിർത്തിയ ആറ് വിമാനക്കമ്പനികൾ വെനസ്വേലയിൽ ഇറങ്ങുന്നത് വിലക്കിയിരുന്നു. മറ്റൊരു രാജ്യത്തിന്റെ വ്യോമമേഖല അടച്ചതായി പ്രഖ്യാപിക്കാൻ അമേരിക്കയ്ക്ക് അവകാശമില്ല.

വ്യോമാതിർത്തിയിൽ എന്തെങ്കിലും തടസ്സം ഉണ്ടായാൽ അമേരിക്കയിൽ നിന്നുള്ള വെനിസ്വേലൻ കുടിയേറ്റക്കാരെ തിരിച്ചയയ്ക്കുന്ന വിമാനങ്ങൾ നിർത്തിവയ്ക്കുമെന്ന് മന്ത്രാലയം മുന്നറിയിപ്പ് നൽകി. ട്രംപ് ഭരണകൂടം വെനിസ്വേലയിൽ സമ്മർദ്ദം ശക്തമാക്കുകയും ലോകത്തിലെ ഏറ്റവും വലിയ വിമാനവാഹിനിക്കപ്പൽ ഉൾപ്പെടെ കരീബിയനിൽ സൈനിക സന്നാഹങ്ങൾ വിന്യസിക്കുകയും ചെയ്ത സാഹചര്യത്തിലാണ് വെനസ്വേലയുടെ മുന്നറിയിപ്പ്.

മയക്കുമരുന്ന് കടത്ത് തടയുക എന്നതാണ് തങ്ങളുടെ പ്രവർത്തനങ്ങളുടെ ലക്ഷ്യമെന്ന് വാഷിംഗ്ടൺ വാദിക്കുമ്പോൾ, യഥാർത്ഥ ലക്ഷ്യം ഭരണമാറ്റമാണെന്ന് വെനസ്വേല ആരോപിക്കുന്നു. സെപ്റ്റംബർ ആദ്യം മുതൽ, കരീബിയൻ കടലിലും കിഴക്കൻ പസഫിക് സമുദ്രത്തിലും മയക്കുമരുന്ന് കടത്തുന്നതായി ആരോപിക്കപ്പെടുന്ന 20 ലധികം കപ്പലുകളിൽ യുഎസ് സൈന്യം ആക്രമണം നടത്തിയിരുന്നു.