ഇൻസ്റ്റ​ഗ്രാം പോസ്റ്റിന് ദുനിയാവിൽ ആരാടാ പാട്ട് നൽകി; ഷാഹിദ് കപൂറിന്റെ പോസ്റ്റ് വൈറൽ

ബോളിവുഡ് നടൻ ഷാഹിദ് കപൂറിന്റെ പോസ്റ്റ് ഏറ്റെടുത്ത് മലയാളികൾ. കഴിഞ്ഞ ദിവസം ഇൻസ്റ്റ​ഗ്രാമിൽ ദുനിയാവിൽ ആരാടാ എന്ന പാട്ട് ചേർത്ത് ചിത്രം പങ്കുവെച്ചതോടെയാണ് മലയാളികൾ കൂട്ടമായി കമന്റ്സുമായെത്തിയത്. 11 ലക്ഷത്തിലേറെ പേരാണ് പോസ്റ്റ് ലൈക്ക് ചെയ്തത്. ‘വെയ്റ്റിങ് ഇൻ ദി ഷാഡോസ്’ എന്ന ക്യാപ്ഷനോട് കൂടിയാണ് ഒരു ഇരുട്ടിൽ നിന്നുള്ള ഫോട്ടോ ഷാഹിദ് പോസ്റ്റ് ചെയ്തത്. എന്നാൽ പോസ്റ്റിന് ബേബി ജീൻ പാടിയ ‘ദുനിയാവിൽ ആരാടാ’ എന്ന പാട്ടാണ് ഷാഹിദ് നൽകിയത്.

ഗായിക റിമി ടോമി അടക്കം നിരവധി പേരാണ് പോസ്റ്റിന് താഴെ കമന്റ് ഇട്ടിരിക്കുന്നത്. ‘ആകെ മലയാളിമയം’, ‘നമ്മുടെ മലയാളം അല്ലെ ആ ഹിന്ദി നാട്ടിൽ കേൾക്കുന്നത്’, ‘അങ്ങ് ബോളിവുഡിലും മലയാളി തരംഗം’, ‘മോനേ ഷാഹിദേ’ ‘ഡാ വല്ലതും അറിഞ്ഞിട്ടാണോ ഈ പാട്ട് അപ്‌ലോഡ് ചെയ്തത്?’, ‘കമന്റ് ബോക്സ് മലയാളികൾ അങ്ങ് എടുത്തു’, ‘പടച്ചോനെ ഒരു മലയാളം പാട്ടല്ലേ ആ കേട്ടത്’ തുടങ്ങി നിരവധി രസകരമായ കമന്റുകളാണ് വന്നുകൊണ്ടിരിക്കുന്നത്.

‘അശ്വത്ഥാമ ദി സാഗ കണ്ടിന്യൂസ്’ എന്നതാണ് ഷാഹിദിന്റെ വരാനിരിക്കുന്ന പാൻ ഇന്ത്യൻ മൂവി. ചിത്രത്തിൽ യോദ്ധാവായ ‘അശ്വത്ഥാമ’യായി ഷാഹിദ് കപൂറാണ് വേഷമിടുന്നത്. ഹിന്ദി, തമിഴ്, തെലുങ്ക്, മലയാളം, കന്നഡ എന്നീ അഞ്ച് ഭാഷകളിലായി ഒരുങ്ങുന്ന ഈ പാൻ ഇന്ത്യൻ ചിത്രം സച്ചിൻ രവിയാണ് സംവിധാനം ചെയ്യുന്നത്. പൂജ എന്റർടൈൻമെന്റിന്റെ ബാനറിൽ വാഷു ഭഗ്‌നാനി, ജാക്കി ഭഗ്‌നാനി, ദീപ്ഷിക ദേശ്മുഖ് എന്നിവർ ചേർന്നാണ് ചിത്രം നിർമിക്കുന്നത്.