വ്യായാമത്തിന്റെ ​ഗുണങ്ങൾ പ്രദാനം ചെയ്യുന്ന​ ​ഗുളിക വികസിപ്പിച്ച് ​ഗവേഷകർ

വാഷിങ്ടൺ: വ്യായാമത്തിന്റെ ഫലം നൽകുന്ന ​ഗുളിക വികസിപ്പിച്ച് അമേരിക്കയിലെ വാഷിങ്ടൺ യൂണിവേഴ്സിറ്റി സ്കൂൾ ഓഫ് മെഡിസിനിലെ ​ഗവേഷക‍ർ. വ്യായാമത്തിന്റെ ​ഗുണങ്ങൾ പ്രദാനം ചെയ്യുന്നുവെന്ന് അവകാശപ്പെടുന്ന മരുന്ന് എലികളിൽ പരീക്ഷിച്ചാണ് ​ഗവേഷണം നടത്തിയത്. വരുംകാലത്ത് മനുഷ്യരിലും ഇതുപകാരപ്പെട്ടേക്കാമെന്നാണ് ​ഗവേഷകർ കരുതുന്നത്.

യുവത്വം കാക്കുക, അമിതവണ്ണം തടയുക, ഹൃദ്രോ​ഗങ്ങൾ, വൃക്കയിലെ തകരാറുകൾ തുടങ്ങിയവയെ പ്രതിരോധിക്കുക തുടങ്ങിയ ​ഗുണങ്ങളാണ് ​പ്രസ്തുത ​ഗുളികയ്ക്കുള്ളതെന്ന് ​ഗവേഷകർ പറയുന്നു. വരാനിരിക്കുന്ന അമേരിക്കൻ കെമിക്കൽ സൊസൈറ്റിയുടെ സമ്മേളനത്തിൽ കണ്ടെത്തൽ അവതരിപ്പിക്കാനിരിക്കുകയാണ് ​ഗവേഷകർ.

ഇത്തരമൊരു മരുന്ന് കണ്ടെത്തിയെങ്കിലും വ്യായാമം പാടേ ഒഴിവാക്കണമെന്ന അഭിപ്രായമല്ല ​ഗവേഷകർ പങ്കുവെക്കുന്നത്. വ്യായാമത്തിന് ബദൽ കൊണ്ടുവരാൻ കഴിയില്ലെന്നും അത്രമേൽ പ്രധാനമാണ് വ്യായാമമെന്നും ​ഗവേഷണത്തിന് നേതൃത്വം നൽകിയ ബഹാ എൽ​ഗൻഡി വ്യക്തമാക്കി. വ്യായാമം ചെയ്യാൻ കഴിയുന്നവർ അതുമായി മുന്നോട്ടുപോവുകതന്നെയാണ് വേണ്ടത്. പക്ഷേ പകരം മറ്റൊരുവഴി വേണ്ടിവരുന്ന പലസാഹചര്യങ്ങളും ഉണ്ടാകാറുണ്ട്. അത്തരക്കാരെ ഉദ്ദേശിച്ചാണ് ഈ മരുന്നെന്നും അദ്ദേഹം പറഞ്ഞു.

പ്രായാധിക്യം മൂലമോ കാൻസർ ബാധിച്ചോ, ചിലതരം ജനിതക തകരാറുകൾ മൂലമോ ഒക്കെ ദിനവും വ്യായാമത്തിലേർപ്പെടാൻ കഴിയാത്തവരെ ഉദ്ദേശിച്ചാണ് ഈ ​ഗുളിക വികസിപ്പിച്ചതെന്നും ​ഗവേഷകർ പറയുന്നു. അടുത്ത അഞ്ചുവർഷത്തിനുള്ളിൽ ഇവ ക്ലിനിക്കുകളിൽ ലഭ്യമാക്കാനാകുമെന്നാണ് പ്രതീക്ഷിക്കുന്നതെന്നും ബഹാ എൽ​ഗൻഡി പറഞ്ഞു. സുരക്ഷിതത്വം ഉറപ്പാക്കാനുള്ള നിരവധി പ്രീക്ലിനിക്കൽ ടെസ്റ്റിങ്ങുകൾ നടത്താനുണ്ടെന്നും അദ്ദേഹം വ്യക്തമാക്കി.

an exercise pill that gives benefits of working out