പ്രായവിവാദം : മധ്യപ്രദേശ് പൊലീസ് കൊച്ചിയിൽ; പൊലീസ് സംരക്ഷണം ആവശ്യപ്പെട്ട് കുംഭമേള വൈറൽ താരം

കൊച്ചി : പൊലീസ് സംരക്ഷണം ആവശ്യപ്പെട്ട് കുംഭമേള വൈറല്‍ താരം. മുഖ്യമന്ത്രിയ്ക്കും കമ്മീഷണർക്കുമാണ് പരാതി നൽകിയത്.മധ്യപ്രദേശ് പൊലീസ് കേരളത്തിൽ വന്നതിന് പിന്നാലെയാണ് പരാതി നൽകിയത്.

പ്രായ വിവാദവുമായി ബന്ധപ്പെട്ട് അന്വേഷണത്തിനായി മധ്യപ്രദേശ് പൊലീസ് എറണാകുളത്തെത്തിയതിന് പിന്നാലെയാണ് സംരക്ഷണം ആവശ്യപ്പെട്ട് പരാതി നല്‍കിയത്. ഭർത്താവ് ഫർമാൻ ഖാനെതിരെ മധ്യപ്രദേശ് പൊലീസ് കേസെടുത്തിരുന്നു. യുവതിയുടെ പിതാവിന്റെ പരാതിയിൽ തട്ടിക്കൊണ്ടുപോകൽ നിയമപ്രകാരമാണ് കേസെടുത്തിരിക്കുന്നത്. പിന്നാലെയാണ് മധ്യപ്രദേശ് പൊലീസ് തൃക്കാക്കര സ്റ്റേഷനിൽ എത്തിയത്.

അതേസമയം, കുംഭമേളയിലെ വൈറൽ താരമായ പെൺകുട്ടിയുടെ വിവാഹത്തിനായി ഹാജരാക്കിയ സർട്ടിഫിക്കറ്റുകൾ വ്യാജമല്ലെന്ന് വിവാഹത്തിൻ്റെ രജിസ്ട്രേഷൻ നിർവഹിച്ച ഉദ്യോഗസ്ഥർ പൊലീസിന് മൊഴി നല്‍കിയിരുന്നു. പൂവാർ പഞ്ചായത്തിലെ ഉദ്യോഗസ്ഥരാണ് പൊലീസിൽ മൊഴി നൽകിയത്. ജനന സർട്ടിഫിക്കറ്റ് , ആധാർ, പാൻ കാർഡ് തുടങ്ങിയവ പരിശോധിച്ചെന്നും രേഖകൾ പ്രകാരം 18 വയസ് പൂർത്തിയായിരുന്നതായും ഉദ്യോഗസ്ഥർ മൊഴി നല്‍കിയിട്ടുണ്ട്. എന്നാൽ, മകൾക്ക് പ്രായപൂർത്തിയായിട്ടില്ലെന്ന് പെൺകുട്ടിയുടെ അമ്മ ലത ഭോഎസ്‌ലെയടക്കം പറയുന്നത്.