കോഴിക്കോട് അപ്സര തിയേറ്ററിൽ വീണ്ടും പ്രദർശനത്തിന് വഴിയൊരുങ്ങുന്നു

കോഴിക്കോട്: ഒരു വർഷമായി അടച്ചിട്ടിരുന്ന കോഴിക്കോട്ടെ പ്രമുഖമായ അപ്സര തീയേറ്റർ വീണ്ടും പ്രദർശനത്തിന് തയ്യാറെടുക്കുന്നു. 52 വർഷക്കാലം മലബാറിലെ സിനിമാ ആസ്വാദകർക്കിടയിൽ പ്രഥമ സ്ഥാനം ഉണ്ടായിരുന്ന അപ്സരക്ക് കഴിഞ്ഞ വർഷം മെയിലാണ് പൂട്ടുവീണത്. 1000ത്തിലധികം പ്രേക്ഷകർക്ക് ഒരേ സമയം സിനിമ ആസ്വദിക്കാൻ കഴിയുമായിരുന്ന കേരളത്തിലെ അപൂർവം തീയേറ്ററുകളിൽ ഒന്നായിരുന്ന അപ്സര.

ലിസ്റ്റിൻ സ്റ്റീഫന്റെ മാജിക് ഫ്രെയിംസ് ഏറ്റെടുത്തതോടെയാണ് സിനിമയുടെ വെള്ളിവെളിച്ചത്തിലേത്ത് വീണ്ടും തിരിച്ചുവരുന്നത്. മാജിക് ഫ്രെയിംസ് അപ്സര എന്ന പേരിൽ ശബ്ദ സംവിധാനങ്ങളിൽ ഉൾപ്പടെ പുതുമയുമായാണ് തിരിച്ചുവരവ്. 1000 പേർക്ക് ഇരിക്കാവുന്ന തീയേറ്റർ എന്ന പ്രത്യേക നിലനിർത്തിക്കൊണ്ടാണ് മുഖം മിനുക്കൽ നടത്തിയത്.

മാജിക് ഫ്രെയിംസുമായി ദീർഘകാല കരാറാണ് ഉള്ളതെന്നും ഏപ്രിൽ-മെയ് മാസം സിനിമാ പ്രദർശനം തുടങ്ങാൻ കഴിയുമെന്നാണ് പ്രതീക്ഷിക്കുന്നതെന്നും തീയേറ്റർ അധികൃതർ പറഞ്ഞു. മമ്മൂട്ടി ചിത്രം ടർബോ, ലിസ്റ്റിൻ സ്റ്റീഫൻ ചിത്രമായ മലയാളി ഫ്രം അമേരിക്ക തുടങ്ങിയ ചിത്രങ്ങൾ മാജിക് ഫ്രെയിംസ് അപ്സരയിലൂടെ പ്രേക്ഷകരിലേക്ക് എത്തുമെന്നാണ് പ്രതീക്ഷ.