രണ്ടാംഘട്ട വെടിനിർത്തൽ ചർച്ച : സമ്പൂർണ യുദ്ധവിരാമത്തിന്​ തയാറാകാതെ ഇസ്രായേൽ

ഗസ്സ സിറ്റി : രണ്ടാംഘട്ട വെടിനിർത്തൽ ചർച്ചക്ക്​ ദോഹയിൽ വേദിയൊരുങ്ങിയെങ്കിലും സമ്പൂർണ യുദ്ധവിരാമത്തിന്​ തയാറാകാതെ ഇസ്രായേൽ. ദോഹയിലെത്തിയ ഇസ്രായേൽ, ഹമാസ്​ സംഘങ്ങളുമായി മധ്യസ്ഥ രാജ്യങ്ങൾ അനൗപചാരിക ചർച്ചക്ക്​ തുടക്കം കുറിച്ചെങ്കിലും കാര്യമായ പുരോഗതിയില്ല. സമ്പൂർണ യുദ്ധവിരാമത്തിലൂടെ മാത്രം ബന്ദികൈമാറ്റം എന്ന ഹമാസ്​ നിലപാട്​ സ്വീകാര്യമല്ലെന്നാണ്​ ഇസ്രായേൽ മധ്യസ്ഥ രാജ്യങ്ങളെ അറിയിച്ചത്​. ഷിൻ ബെത്​, മൊസാദ്​, സൈന്യം എന്നിവയുടെ പ്രതിനിധികളാണ്​ ഇസ്രായേൽ സംഘത്തിലുളളത്​.

യുദ്ധം പൂർണമായും അവസാനിപ്പിക്കുന്ന അനുമതി സംഘത്തിന്​ നെതന്യാഹു നൽകിയിട്ടില്ല. അതേസമയം ബന്ദികളുടെ മോചനവുമായി ബന്ധപ്പെട്ട ചർച്ച ഫലപ്രാപ്തിയിൽ എത്തുമെന്നാണ്​ പ്രതീക്ഷയെന്ന്​ അമേരിക്കയുടെ പശ്ചിമേഷ്യൻ പ്രതിനിധി സ്റ്റിവ്​ വിറ്റ്​കോഫ്​ പറഞ്ഞു. അടുത്ത ദിവസങ്ങളിൽ ഹമാസും ഇസ്രായേലും തമ്മിൽ നടക്കുന്ന ചർച്ചകളുടെ പുരോഗതി നോക്കിയാകും തങ്ങളുടെ ഇടപെടലെന്നും അദ്ദേഹം വ്യക്​തമാക്കി.

ബന്ദിമോചന വിഷയത്തിൽ ഹമാസുമായി അമേരിക്ക നേരിട്ട്​ ചർച്ച നടത്തിയതിനു പുറമെ ഹമാസിനെ പ്രകീർത്തിച്ചു കൊണ്ടുള്ള യു.എസ്​ പ്രതിനിധി ആഡം ബോഹ്​ലെറുടെ പ്രതികരണവും ഇസ്രായേലിനെ രോഷം കൊള്ളിച്ചിരുന്നു. ഈ സാഹച​ര്യത്തിൽ ഹമാസുമായി ഇനി നേരിട്ടുള്ള ചർച്ച ട്രംപ്​ ഭരണകൂടം ഉപേക്ഷിക്കുമെന്ന്​ ഉദ്യോഗസ്ഥരെ ഉദ്ധരിച്ച്​ യുഎസ്​ മാധ്യമങ്ങൾ റിപ്പോർട്ട്​ ചെയ്തു.

സഹായ വസ്തുക്കൾ തടയുകയും വൈദ്യുതിബന്ധം വിഛേദിക്കുകയും ചെയ്തതോടെ ഗസ്സയിലെ സ്ഥിതിഗതികൾ ഏറെ വഷളായതായി അന്താരാഷ്ട്ര റെഡ്​ക്രോസ്​ സംഘം വ്യക്​തമാക്കി. അടിയന്തര ഇടപെടൽ ഉണ്ടായില്ലെങ്കിൽ കുഞ്ഞുങ്ങൾ ഉൾപ്പെടെ ആയിരങ്ങൾ മരിച്ചു വീഴുമെന്നും റെഡ്​​ക്രോസ്​ മുന്നറിയിപ്പ്​ നൽകി. ഗസ്സയിലേക്ക്​ രണ്ടു ദിവസത്തിനുള്ളിൽ സഹായം എത്തിച്ചില്ലെങ്കിൽ ഇസ്രായേൽ കപ്പലുകൾക്കെതിരെ ആക്രമണം പുനരാരംഭിക്കാനുള്ള തീരുമാനത്തിൽ മാറ്റമില്ലെന്ന്​ യെമനിലെ ഹൂതികൾ അറിയിച്ചു.