ഗാ​സ‌‌​യി​ൽ ഇന്ന് മുതൽ നാല് ദിവസത്തേക്ക് വെടിനിർത്തൽ; 13 ബന്ദികളെ ഹമാസ് കൈമാറും

ഗാ​സ‌‌സിറ്റി: 48 നാളുകൾ നീണ്ട ആക്രമണത്തിനൊടുവിൽ ഗാ​സ‌‌യിൽ വെടിനിർത്തൽ ഇന്ന് രാവിലെ പ്രാദേശികസമയം ഏഴ് മണി മുതൽ പ്രാബല്യത്തില്‍ വരും. ബന്ദികളിൽ 13 പേരെ വൈകീട്ട്​ കൈമാറും. ഇന്ത്യൻ സമയം കാലത്ത്​ ഏതാണ്ട്​ പത്തര മണിയോടെയാണ്​ വെടിനിർത്തൽ നടപ്പിൽ വരിക. നാലു ദിവസത്തെ താൽകാലിക യുദ്ധവിരാമത്തിനാണ് കരാർ.

സ്​ത്രീകളും കുട്ടികളും ഉൾപ്പെടുന്ന ബന്ദികളിൽ നിന്നുള്ള ആദ്യ സംഘത്തെ വൈകീട്ട്​ നാല് മണിയോടെ മോചിപ്പിക്കും. ​ഇവരുടെ പേരു വിവരങ്ങൾ ഇസ്രായേലിന്​ കൈമാറിയതായി ഖത്തർ അറിയിച്ചു. അന്താരാഷ്​ട്ര റെഡ്​ക്രോസ്​, റെഡ്​ക്രസൻറ്​ എന്നീ കൂട്ടായ്​മകൾ ബന്ദികളുടെയും തടവുകാരുടെയും കൈമാറ്റത്തിന്​ മേൽനോട്ടം വഹിക്കും. ഇരുപക്ഷവും കരാർ വ്യവസ്​ഥകൾ പൂർണമായും പാലിക്കണമെന്നും മധ്യസ്​ഥ രാജ്യങ്ങൾ ആവശ്യപ്പെട്ടു. ഖത്തർ നേതൃത്വത്തിൽ ഈജിപ്തും അമേരിക്കയുമായി സഹകരിച്ചാണ് വെടിനിർത്തൽ യാഥാർഥ്യമാകുന്നത്. ഗസ്സയിലേക്ക്​ കൂടുതൽ സഹായം എത്തിക്കാൻ വെടിനിർത്തൽ വേളയിൽ നീക്കം നടക്കുമെന്ന്​ അമേരിക്ക അറിയിച്ചു.

അതേസമയം, താൽക്കാലിക വെടിനിർത്തൽ സമയം തീരുന്നതോടെ ആക്രമണവുമായി മുന്നോട്ടു പോകുമെന്നും രണ്ടു മാസമെങ്കിലും തുടർന്ന്​ യുദ്ധം നീണ്ടുനിന്നേക്കുമെന്നും ഇസ്രായേൽ പ്രതിരോധ മന്ത്രി ഗാലൻറ്​ വ്യക്തമാക്കി. വ്യാഴാഴ്ച രാവിലെ മുതൽ ഗാ​സ‌‌യിലുടനീളം കര, വ്യോമ മാർഗങ്ങളിലൂടെ താമസകേന്ദ്രങ്ങളും ആശുപത്രികളും ലക്ഷ്യമിട്ട് കനത്ത ആക്രമണമാണ് ഇസ്രായേൽ സേന തുടർന്നത്​. ​വെടിനിർത്തലിന് മുമ്പുള്ള മണിക്കൂറുകൾ കൂട്ടക്കുരുതിക്കുള്ള അവസരമായി സൈന്യം കണ്ടുവെന്ന്​ ഗാ​സ‌‌യിലെ ആരോഗ്യ മന്ത്രാലയം പറഞ്ഞു.

ഗാ​സ‌‌യിൽ മരണം ഏതാണ്ട്​ പതിനയ്യായിരമായി. ഇവരിൽ 6150 പേർ കുട്ടികളും നാലായിരം പേർ സ്​ത്രീകളും. പരിക്കേറ്റവരുടെ എണ്ണം 36,000 കവിഞ്ഞു. ഇവരിൽ മൂന്നിൽ രണ്ടും സ്​ത്രീകളും കുട്ടികളുമാണെന്നാണ് പലസ്​തീൻ ആരോഗ്യ മന്ത്രാലയം പറയുന്നത്.. കാണാതായ ഏഴായിരത്തോളം പേർ കൊല്ലപ്പെട്ടിരിക്കാനാണ്​ സാധ്യത. കെട്ടിടാവശിഷ്​ടങ്ങൾക്കടിയിൽ നിന്ന്​ മൃതദേഹങ്ങൾ കണ്ടെത്തി സംസ്​കരിക്കാൻ താൽക്കാലിക വെടിനിർത്തൽ ഉപകരിക്കും. സമ്പൂർണ വെടിനിർത്തലും, മേഖലയിലെ സമാധാനം പുനസ്ഥാപിക്കലുമാണ് ഞങ്ങളുടെ ലക്ഷ്യമെന്ന് മധ്യസ്​ഥ രജ്യമായ ഖത്തറും വിവിധ ലോകരാജ്യങ്ങളും വ്യക്​തമാക്കുന്നുണ്ടെങ്കിലും ഹമാസിനെ അമർച്ച ചെയ്യാതെ പിൻവാങ്ങില്ലെന്ന നിലപാട്​ ആവർത്തിക്കുകയാണ്​ ഇസ്രായേൽ.

കടുത്ത പോരാട്ടത്തിലൂടെ പിന്നിട്ട 48 ദിവസം ഇസ്രായേലി​െൻറ 335 ​സൈനിക വാഹനങ്ങൾ തകർക്കാനും നിരവധി സൈനികരെ കൊലപ്പെടുത്താനും സാധിച്ചതായി അൽഖസ്സാം ബ്രിഗേഡ്​ വക്​താവ്​ അബൂ ഉബൈദ വ്യക്തമാക്കി. ഗാ​സ‌‌യിൽ നിന്ന്​ ഫലസ്​തീനികളെ പുറന്തള്ളുന്നത്​ ചെറുക്കുമെന്ന്​ ഈജിപ്​ത്​ പ്രസിഡൻറും പറഞ്ഞു. ലബനാനിൽ നിന്ന്​ നിരവധി മിസൈലുകൾ ​ വന്നതോടെ ഹിസ്​ബുല്ല കേന്ദ്രങ്ങളിൽ ശക്​തമായ പ്രത്യാക്രമണം നടത്തിയെന്നും ഇസ്രായേൽ സൈന്യം അറിയിച്ചു.