ഗാ​സ: നാലു ദിവസം നീണ്ടുനിൽക്കുന്ന താൽക്കാലിക വെടിനിർത്തൽ ഇന്ന്​ പ്രാബല്യത്തിൽ

ഗാ​സ: ഗാ​സയിൽ നാലു ദിവസം നീണ്ടുനിൽക്കുന്ന താൽക്കാലിക വെടിനിർത്തൽ ഇന്ന്​ പ്രാബല്യത്തിൽ വരും. വെടിനിർത്തൽ ആരംഭിക്കുന്ന സമയക്രമം സംബന്​ധിച്ച അവ്യക്​തത ഖത്തർ ഇടപെട്ട്​ പരിഹരിക്കുമെന്ന്​ അമേരിക്ക. ബന്ദികളുടെ കൈമാറ്റം നടപ്പാകുന്നതോടെ ഗാ​സയിലേക്ക്​ കൂടുതൽ സഹായം എത്തിക്കും. സമഗ്രവെടിനിർത്തൽ നിർദേശം തള്ളിയ ഇസ്രായേൽ, ഹമാസിനെ തുരത്തും വരെ യുദ്ധം തുടരുമെന്ന്​ മുന്നറിയിപ്പ്​ നൽകി. ലോകത്തി​ന്‍റെ ഏതു ഭാഗത്തായാലും ഹമാസ്​ നേതാക്കളെ വകവരുത്താൻ നെതന്യാഹു മൊസാദിനോട്​ ഉത്തരവിട്ടു. ഗാ​സയിൽ മരണസംഖ്യ 14,500 കടന്നു.

48 ദിവസങ്ങൾ നീണ്ട ആക്രമണത്തിനൊടുവിൽ ഖത്തറി​ന്‍റെയും ഈജിപ്​തി​ന്‍റെയും മധ്യസ്​ഥതയിൽ ഇസ്രായേലും ഹമാസും ഒപ്പുവെച്ച നാലു നാൾ നീണ്ടുനിൽക്കുന്ന വെടിനിർത്തൽ കരാർ ഇന്ന്​ പ്രാബല്യത്തിൽ വരും. പ്രാദേശിക സമയം രാവിലെ 10ന്​ വെടിനിർത്തൽ ആരംഭിക്കും എന്നായിരുന്നു റിപ്പോർട്ട്​. എന്നാൽ കരാറിൽ ഇക്കാര്യം വ്യക്​തമാക്കാത്ത സാഹചര്യത്തിൽ മധ്യസ്​ഥ രാജ്യമായ ഖത്തർ കൂടിയാലോചനകളിലൂടെ തീരുമാനം അറിയിക്കുമെന്ന്​ യു.എസ്​ ദേശീയസുരക്ഷാ ഉപദേഷ്​ടാവ്​ അറിയിച്ചു. വെടിനിർത്തൽ എപ്പോൾ ആരംഭിക്കും എന്നറിയില്ലെന്ന്​ രാത്രി ഇസ്രായേൽ സൈന്യം പ്രതികരിച്ചു. വെടിനിർത്തൽ വേളയിൽ ഗാ​സയിലെ സൈനികർക്ക്​ ഇൻറലിജൻസ്​ വിവരങ്ങൾ കൈമാറുമെന്ന്​ ഇസ്രായേൽ പ്രതിരോധ മന്ത്രി പറഞ്ഞു.