ഐഫോണിലും ഐപാഡിലും ഗുരുതര സുരക്ഷാ പ്രശ്നങ്ങൾ; ആശങ്കയിൽ ഉപഭോക്താക്കൾ
ന്യൂഡൽഹി: ആപ്പിള്‍ ഐഒഎസ്, ഐപാഡ് ഒഎസ് ഉപകരണങ്ങളില്‍ ഗുരുതര സുരക്ഷാ മുന്നറിയിപ്പുമായി ഇന്ത്യന്‍ കംപ്യൂട്ടര്‍ എമര്‍ജന്‍സി റെസ്‌പോണ്‍സ് ടീം (സേര്‍ട്ട്-ഇന്‍). ആപ്പിള്‍ ഐഒഎസിലും, ഐപാഡ് ഒഎസിലും നിരവധി പ്രശ്‌നങ്ങള്‍ കണ്ടെത്തിയെന്ന് റിപ്പോർട്ടിൽ പറയുന്നു. ഇതുവഴി ഒരു ഹാക്കര്‍ക്ക് ഉപകരണത്തിന്റെ പ്രവര്‍ത്തനം തടസപ്പെടുത്താനും കോഡുകള്‍ പ്രവര്‍ത്തിപ്പിക്കാനും സ്വകാര്യ വിവരങ്ങള്‍ എടുക്കാനും സാധിക്കുമെന്നാണ് വിവരം. സുരക്ഷാ സംവിധാനങ്ങളെ മറികടക്കാനുള്ള സാധ്യതയും റിപ്പോർട്ട് തള്ളുന്നില്ല. മാര്‍ച്ച് 15 ന് പുറത്തിറക്കിയ റിപ്പോർട്ട് സേര്‍ട്ട് ഇന്‍ വെബ്‌സൈറ്റില്‍ നല്‍കിയിട്ടുണ്ട്.
ഐഒഎസിന്റേയും, ഐപാഡ് ഒഎസിന്റെയും 16.7.6 വേര്‍ഷന് മുമ്പുള്ള പതിപ്പുകളിലാണ് പ്രശ്‌നമുള്ളത്. ഐഫോണ് 8, ഐഫോണ് 8 പ്ലസ്, ഐഫോണ് ടെന്‍, ഐപഡ് അഞ്ചാം തലമുറ, ഐപാഡ് പ്രോ 9.7 ഇഞ്ച്, ഐപാഡ് പ്രോ 12.9 ഇഞ്ച് തുടങ്ങിയ ഉപകരണങ്ങളെ പ്രശ്‌നം ബാധിക്കും. ഐഫോണ് ടെന്‍എസിലും അതിന് ശേഷം വന്ന പുതിയ മോഡലുകളിലും ഐഒഎസ് 17.4 ന് മുമ്പുള്ള പതിപ്പുകളെ പ്രശ്‌നം ബാധിക്കും. ഐപാഡ് പ്രോ 12.9 ഇഞ്ച് രണ്ടാം തലമുറയിലും അതിന് ശേഷം വന്ന പുതിയ മോഡലുകളിലും പ്രശ്‌നമുണ്ട്. ഐപാഡ് എയര്‍ മൂന്നാം തലമുറയിലും പുതിയ പതിപ്പുകളിലും ഐപാഡ് ആറാം തലമുറയിലും പുതിയ മോഡലുകളിലും ഐപാഡ് മൂന്നാം തലമുറ, ഐപാഡ് ആറാം തലമുറയിലും പുതിയ മോഡലുകളിലും ഐപാഡ് മിനി അഞ്ചാം തലമുറ പുതിയ മോഡലുകളിലും പ്രശ്‌നങ്ങള്‍ കണ്ടെത്തിയിട്ടുണ്ട്.
ബ്ലൂടൂത്ത്, ലിബ്എക്‌സ് പിസി, മീഡിയാ റിമോട്ട്, ഫോട്ടോസ്, സഫാരി ആന്റ് വെബ്കിറ്റ് ഭാഗങ്ങള്‍ എന്നിവയില്‍ ശരിയായ വാലിഡേഷന്‍ നടക്കാത്തതാണ് ഈ പ്രശ്‌നങ്ങള്‍ക്ക് കാരണമെന്ന് സേര്‍ട്ട്ഇന്‍ പറയുന്നു. എക്‌സ്റ്റെന്‍ഷന്‍ കിറ്റ്, മെസേജസ്, ഷെയര്‍ഷീറ്റ്, സിനാപ്‌സ് ആന്റ് നോട്ട്‌സ് എന്നിവയിലും പ്രശ്‌നങ്ങളുണ്ട്. ഇങ്ങനെ വിവിധങ്ങളായ മറ്റ് പല പ്രശ്‌നങ്ങളും സെര്‍ട്ട്ഇന്‍ ചൂണ്ടിക്കാട്ടി. ഈ പ്രശ്‌നങ്ങള്‍ ദുരുപയോഗം ചെയ്യപ്പെടുന്നത് ഫോണിന്റെ സുരക്ഷയെ ബാധിക്കും.
സോഫ്റ്റ് വെയര്‍ അപ്‌ഡേറ്റ് ചെയ്യുക, സുരക്ഷാ പാച്ച് അപ്‌ഡേറ്റുകളും ഇന്‍സ്റ്റാള്‍ ചെയ്യുക, സുരക്ഷിതമായ കണക്ഷനുകള്‍ മാത്രം ഉപയോഗിക്കുക, പൊതുവിടങ്ങളിലെ വൈഫൈ കണക്ഷന്‍ ഉപയോഗിക്കാതിരിക്കുക എന്നിവയാണ് പരിഹാര മാർഗങ്ങൾ. ടു ഫാക്ടര്‍ ഒതന്റിക്കേഷന്‍ ആക്ടിവേറ്റ് ചെയ്യുക, ആപ്പുകള്‍ ഡൗണ്‍ലോഡ് ചെയ്യുവാന്‍ വിശ്വാസയോഗ്യമായ ആപ്പ് സ്റ്റോറുകള്‍ മാത്രം ഉപയോഗിക്കുക, ഡേറ്റ സ്ഥിരമായി ബാക്ക്അപ്പ് ചെയ്യുക, സേര്‍ട്ട് ഇന്‍ പോലുള്ള സുരക്ഷാ ഏജന്‍സികളുടെ മുന്നറിയിപ്പുകള്‍ ശ്രദ്ധിക്കുക എന്നിവ മൂലവും സുരക്ഷാ പ്രശ്നങ്ങൾ മറികടക്കാം.
