ഉത്കണ്ഠ വൈകല്യങ്ങൾ എന്നത് മാനസികാരോഗ്യ പ്രശ്നങ്ങളോ ?

ഡോ. ബിന്ദു മേനോൻ, പ്രൊഫസർ & ഹെഡ് ഓഫ് ഡിപ്പാർട്മെൻറ്, സൈക്യാട്രി & ക്ലിനിക്കൽ സൈക്കോളജി, അമൃത ഹോസ്പിറ്റൽ, കൊച്ചി

ഉത്കണ്ഠ അല്ലെങ്കിൽ ആംഗ്‌സൈറ്റി ഉണ്ടാകുന്നത് ജീവിതത്തിൽ സാധാരണമായ കാര്യമാണ്. കുട്ടികളും മുതിർന്നവരും അങ്ങനെ പ്രായഭേദം ഒന്നുമില്ലാതെ അനുഭവിക്കുന്ന ഒന്ന്. ഒരു പരീക്ഷയ്ക്ക് മുൻപോ, അല്ലെങ്കിൽ ജീവിതത്തിലെ നിർണ്ണായകമായ ഒരു ഘട്ടത്തിൽ എല്ലാവരും അനുഭവിക്കുന്ന ഒരു സ്വാഭാവിക കാര്യം തന്നെയാണ് ഉത്കണ്ഠ.

എന്നാലിത് ചിലരിൽ സ്ഥിരവും, അമിതവും അവരുടെ ദൈനംദിന ജീവിതത്തെ പൂർണമായും തകിടം മറിക്കുന്ന തരത്തിൽ ബുദ്ധിമുട്ട് ഉണ്ടാക്കുന്ന തരത്തിലും കണ്ടുവരുന്നു. ആഗോള തലത്തിൽ തന്നെ ഏറ്റവും സാധാരണമായി കണ്ടുവരുന്ന മാനസികാരോഗ്യ അവസ്ഥകളിൽ ഒന്നാണ് ഉത്കണ്ഠ വൈകല്യങ്ങൾ. ഒരു ബാഹ്യസമ്മർദവും ഇല്ലാതെ തന്നെ നിയന്ത്രിക്കാൻ കഴിയാത്ത ഭയത്തിനും, ഉൽകണ്ഠക്കും പാത്രമാകുന്ന ഈ അവസ്ഥ ചികിത്സിച്ചില്ലെങ്കിൽ മാസങ്ങളും, വർഷങ്ങളും നീണ്ടു നിൽക്കുന്നതിന് സാധ്യതകളുണ്ട്.

നിരവധിയായ ഉത്കണ്ഠ വൈകല്യങ്ങൾ ഉണ്ട്…
ആരോഗ്യം, സാമ്പത്തികം, ബന്ധങ്ങൾ, ജോലി തുടങ്ങി എന്തിനെ കുറിച്ചും വിട്ടുമാറാത്ത ആശങ്കപ്പെടുന്നവരെ ജനറലൈസ്ഡ് ആംഗ്‌സൈറ്റി ഡിസോർഡർ അഥവാ GAD യിൽ ഉൾപ്പെടുന്നു. പാനിക്ക്  ഡിസോർഡർ എന്ന് പറയുന്നത് പെട്ടെന്ന് ഉണ്ടാകുന്ന തീവ്ര ഭയത്തിൻ്റെ എപ്പിസോഡുകൾ അഥവാ പാനിക്ക് അറ്റാക്കുകൾ എന്നറിയപ്പെടുന്നു. സാമൂഹിക സാഹചര്യങ്ങളിൽ മറ്റുള്ളവർ നിരീക്ഷിക്കുകയോ വിലയിരുത്തുകയോ ചെയ്യുന്നു എന്നുള്ള തീവ്രമായ ഭയം സാമൂഹിക ഉത്ക്കണ്ഠ വൈകല്യം അഥവാ സോഷ്യൽ ആംഗ്‌സൈറ്റി ഡിസോർഡർ എന്നും അറിയപ്പെടുന്നു. ഓരോ സാധനങ്ങളോടും, അവസ്ഥകളോടുമുള്ള ഭയത്തെ ഫോബിയ എന്ന് പറയുന്നു. ഉയർന്ന ഹൃദയമിടിപ്പ്, തലകറക്കം, ശ്വാസ തടസ്സം തുടങ്ങിയ ലക്ഷണങ്ങൾ ഈ സാഹചര്യങ്ങളിൽ കണ്ടുവരുന്നു.

ഉത്കണ്ഠ വൈകല്യങ്ങളുടെ ലക്ഷണങ്ങൾ ഓരോ വ്യക്തിയെയും ആശ്രയിച്ച് വ്യത്യസ്തമായിരിക്കും. എങ്കിലും  പൊതുവായി കണ്ട് വരുന്ന ചില ലക്ഷണങ്ങൾ ശ്രദ്ധ കേന്ദ്രീകരിക്കാൻ ബുദ്ധിമുട്ട്, നിരന്തരമായ ഉത്കണ്ഠ, ശ്വാസതടസ്സം, ഉയർന്ന ഹൃദയമിടിപ്പ്, വിറയൽ, ഉറക്കമില്ലായ്മ എന്നിങ്ങനെയാണ്.

ആംഗ്‌സൈറ്റി രോഗത്തിൻ്റെ കാരണങ്ങൾ പലപ്പോഴും സങ്കീർണ്ണമാണ്. ജനിതകവും, ബാഹ്യവുമായ കാരണങ്ങൾ ഇതിനെ സ്വാധീനിക്കുന്നു. കുടുംബത്തിൽ ഉത്കണ്ഠയോ മറ്റ് മാനസിക ബുദ്ധിമുട്ടുകളോ ഉണ്ടെങ്കിൽ ഈ രോഗ സാധ്യത കൂടുതലാകുന്നു. ജീവിത സാഹചര്യങ്ങൾ, അപകടങ്ങൾ, തുടർച്ചയായ സമ്മർദ്ദ സാഹചര്യങ്ങൾ, വിട്ടുമാറാത്ത അസുഖങ്ങൾ എന്നിവയാണ് ബാഹ്യ കാരണങ്ങൾ ആയി കണക്കാക്കുന്നത്.

ഉത്കണ്ഠ രോഗനിർണയം നടത്തുന്നതിന് വിശദമായ ചോദ്യാവലിയും, മാനദണ്ഡങ്ങളും നിലവിലുണ്ട്. രോഗലക്ഷണങ്ങൾ ആവർത്തിക്കുന്ന രീതി, നിത്യ ജീവിതത്തിൽ അവ എത്രത്തോളം ബുദ്ധിമുട്ട് ഉണ്ടാക്കുന്നു എന്നിങ്ങനെ അനേകം ചോദ്യങ്ങൾ അടിസ്ഥാനമാക്കിയാണ് രോഗ നിർണ്ണയം നടത്തുന്നത്. ഉത്കണ്ഠ രോഗചികിത്സയിൽ വ്യാപകമായി ഉപയോഗിക്കുന്ന രീതി കോഗ്നിട്ടീവ് ബിഹേവിയർ തെറാപ്പിയാണ്. ഇത് രോഗികളെ അവരുടെ നെഗറ്റീവ് ചിന്താഗതികൾ തിരിച്ചറിയാനും അവയെ മാറ്റുന്നതിനും സഹായിക്കുന്നു.  ജനറൽ അംഗ്‌സൈറ്റി ഡിസോർഡർ, പാനിക്ക് ഡിസോർഡർ, സോഷ്യൽ അംഗ്‌സൈറ്റി എന്നിവയ്ക്ക് ഏറ്റവും ഫലപ്രദമായ ചികിത്സാ രീതിയായി ഇത് കണക്കാക്കുന്നു.

ഫോബിയകളെ ചികിത്സിക്കുന്നതിന് രോഗിയിൽ ഭയം ഉളവാക്കുന്ന വസ്തുക്കളോ, സാഹചര്യങ്ങളോടോ സുരക്ഷിത സാഹചര്യത്തിൽ ഇടപെടുത്തുന്നത് ഫലപ്രദമായി കണ്ടുവരുന്നു. ഉത്കണ്ഠ ചികിത്സക്ക് നിരവധി ഫലപ്രദമായ മരുന്നുകൾ പ്രചാരത്തിലുണ്ട്. ഗുരുതരമായ പാർശ്വ ഫലങ്ങൾ ഉള്ളവയോ അഡിക്ഷൻ സ്വഭാവം ഉണ്ടാക്കുന്നവയോ അല്ലാത്ത മരുന്നുകൾ ഇപ്പോൾ ലഭ്യമാണ്. മാനസിക രോഗങ്ങൾക്ക് ചികിത്സ തേടുന്നത് ഇപ്പോഴും നമ്മുടെ സമൂഹത്തിൽ മാനസിക രോഗി ആയി കണക്കാക്കുന്നത് കൊണ്ട് തന്നെ പലരും മാനസികാരോഗ്യ വിദഗ്ധരെ കാണുന്നതിന് മടിക്കുകയും, മറ്റുള്ളവരോട് പറയാനും മടി കാണിക്കുന്നു.

ആരോഗ്യകരമായ ജീവിത ശൈലിയും, വ്യായാമവും മാനസിക സമ്മർദ്ദങ്ങളെ ലഘൂകരിക്കാൻ സഹായിക്കുമെങ്കിലും ഇത് മാത്രം ഉപയോഗിച്ച് ഉത്കണ്ഠ രോഗങ്ങളെ മറികടക്കാൻ സാധ്യമല്ല. മുകളിൽ പറഞ്ഞ ലക്ഷണങ്ങൾ കാണുകയാണെങ്കിൽ തീർച്ചയായും വിദഗ്ദ്ധ വൈദ്യോപദേശം തേടേണ്ടതാണ്.

നേരത്തെയുള്ള ഇടപെടലുകളാണ് ഉത്കണ്ഠ ചികിത്സയിൽ ഏറ്റവും നിർണായകം. ട്രിഗറുകൾ തിരിച്ചറിയാനും, റിലാക്സേഷൻ ടെക്നിക്കുകളും വഴി രോഗത്തെ നിയന്ത്രിക്കാൻ കഴിയാതെ വന്നാൽ മൊത്തത്തിലുള്ള  ജീവിത നിലവാരം തന്നെ താഴേക്ക് പോകും. അത് കൊണ്ട് മാനസിക ബുദ്ധിമുട്ടുകൾ നേരിടുമ്പോൾ ഡോക്ടറെ കാണുന്നതിൽ നാണക്കേട് ഇല്ല എന്നും ശാരീരിക ആരോഗ്യം പോലെത്തന്നെ ചികിത്സ ആവശ്യമുള്ള ഒന്നാണ് മാനസിക ആരോഗ്യം എന്നും തിരിച്ചറിയുക. ശരിയായ ഇടപെടലുകൾ, മരുന്നുകൾ, സ്വയം പരിചരണം എന്നിവ വഴി ജീവിതത്തിൻ്റെ നിയന്ത്രണം വീണ്ടെടുക്കാനും ആരോഗ്യകരമായി മുന്നോട്ട് കൊണ്ട് പോകാനും സാധിക്കും.