ജപ്പാനില്‍ വീണ്ടും ഭൂകമ്പം

ടോക്യോ : ജപ്പാനില്‍ വീണ്ടും ഭൂകമ്പം. റിക്ടര്‍ സ്‌കെയിലില്‍ 6 തീവ്രത രേഖപ്പെടുത്തിയ ഭൂകമ്പമാണ് ഉണ്ടായത്. കഴിഞ്ഞയാഴ്ച രാജ്യത്തുണ്ടായ ഭൂകമ്പത്തിന്റെ നടുക്കം വിട്ടുമാറും മുമ്പാണ് വീണ്ടും ഭൂചലനമുണ്ടായത്. 

ഭൂചലനത്തില്‍ ജപ്പാനില്‍ കനത്ത പ്രകമ്പനം അനുഭവപ്പെട്ടു. എന്നാല്‍ സുനാമി മുന്നറിയിപ്പ് പുറപ്പെടുവിച്ചിട്ടില്ല. ജനുവരി ഒന്നിന് ശക്തമായ ഭൂകമ്പമുണ്ടായ മേഖലകളില്‍ തന്നെയാണ് വീണ്ടും ഭൂചലനം അനുഭവപ്പെട്ടതെന്ന് ജപ്പാന്‍ കാലാവസ്ഥാ ഏജന്‍സി അറിയിച്ചു.

പുതുവര്‍ഷദിനത്തില്‍ 7.5 തീവ്രത രേഖപ്പെടുത്തിയ ഭൂകമ്പത്തില്‍ കനത്ത നാശനഷ്ടമാണ് ഉണ്ടായത്. മരണം 200 കടന്നു. ഇനിയും നൂറിലേറെ പേരെ കണ്ടെത്താനായിട്ടില്ലെന്നാണ് റിപ്പോര്‍ട്ടുകള്‍. നിരവധി കെട്ടിടങ്ങള്‍ തകര്‍ന്നടിഞ്ഞു.