ഒമ്പതാം ദിനം 100 കോടി; അതിവേ​ഗം ആടുജീവിതം

മലയാള സിനിമ ചരിത്രത്തിൽ അതിവേ​ഗം 100 കോടി ക്ലബ്ബിലെത്തുന്ന സിനിമയായി ആടുജീവിതം. ബ്ലെസി-പൃഥ്വിരാജ് കൂട്ടുകെട്ടിലെത്തിയ ചിത്രം ബോ​ക്സ് ഓഫീസിൽ ജൈത്രയാത്ര തുടരുകയാണ്. നാലാം ദിനം 50 കോടി നേടിയ സിനിമ ഒമ്പത് ദിനങ്ങൾ കൊണ്ട് 100 കോടി ക്ലബ്ബിലും ഇടം പിടിച്ചു. 2024ൽ മലയാളത്തിലിറങ്ങിയ മൂന്നാമത്തെ ചിത്രമാണ് 100 കോടി ക്ലബിൽ കയറുന്നത്. ഹിന്ദി, തെലുങ്ക്, ഹോളിവുഡ് ഹിറ്റ്‌ ചിത്രങ്ങളെ മറികടന്ന് ഇന്ത്യയില്‍ തന്നെ ഒന്നാം സ്ഥാനത്താണ് ആടുജീവിതം. കരീന കപൂര്‍, തബു തുടങ്ങിയവര്‍ അഭിനയിച്ച ഹിറ്റ്‌ ചിത്രം ‘ക്രൂ’, അനുപമ പരമേശ്വരൻ നായികയായെത്തിയ സൂപ്പര്‍ ഹിറ്റ്‌ തെലുങ്കു ചിത്രം ‘ടില്ലു സ്‌ക്വയർ’, ഹോളിവുഡ് ചിത്രം ‘ഗോഡ്‌സില്ല x കോങ്: ദ ന്യൂ എംപയർ’, വിജയ് ദേവരകൊണ്ടയുടെ ‘ദ ഫാമിലി സ്റ്റാർ’ തുടങ്ങിയ ചിത്രങ്ങളെ പിന്നിലാക്കിയാണ് ആടുജീവിതത്തിന്റെ കുതിപ്പ്.

ഫെബ്രുവരിയിലിറങ്ങിയ പ്രേമലുവും മഞ്ഞുമ്മൽ ബോയ്സും മികച്ച കളക്ഷൻ നേടി പ്രദർശനം തുടരുന്നതിന് ഇടയിലാണ് ആടുജീവിതത്തിന്റെ നേട്ടം. മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളിൽ സിനിമ റിലീസ് ചെയ്തിരുന്നു. ഓസ്കാർ അവാർഡ്‌ ജേതാക്കളായ എ ആർ റഹ്മാൻ സംഗീതവും റസൂൽ പൂക്കുട്ടി ശബ്ദമിശ്രണവും നിർവഹിക്കുന്ന ചിത്രത്തിൽ പൃഥ്വിരാജിന്റെ നായികയായെത്തുന്നത് അമല പോളാണ്. വിഷ്വൽ റൊമാൻസിന്റെ ബാനറിൽ പ്രദർശനത്തിനെത്തിയ ചിത്രത്തിൽ ജിമ്മി ജീൻ ലൂയിസ് (ഹോളിവുഡ് നടൻ), കെ ആർ ഗോകുൽ, അറബ് അഭിനേതാക്കളായ താലിബ് അൽ ബലൂഷി, റിക്കാബി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.