ഓഗസ്റ്റ് 23 ഇനി ‘നാഷണല്‍ സ്‌പേസ് ഡേ’ : പ്രധാനമന്ത്രി
ബംഗളൂരു : ചന്ദ്രയാന്‍ 3 ചന്ദ്രനില്‍ സോഫ്റ്റ് ലാന്‍ഡ് ചെയ്ത ഓഗസ്റ്റ് 23 ഇനി “നാഷണല്‍ സ്‌പേസ് ഡേ’ (ദേശീയ ബഹിരാകാശ ദിനം) ആയി ആചരിക്കുമെന്ന് പ്രധാനമന്ത്രി നരേന്ദ്രമോദി. ചന്ദ്രയാന്‍ 3ന്‍റെ ദൗത്യസംഘത്തെ ബംഗളൂരു ഇസ്ട്രാക്കിലെത്തി അഭിനന്ദിച്ച ശേഷം സംസാരിക്കുമ്പോഴാണ് പ്രധാനമന്ത്രിയുടെ പ്രഖ്യാപനം.
വിക്രം ലാന്‍ഡര്‍ ഇറങ്ങിയ സ്ഥലം ഇനി “ശിവശക്തി’ പോയിന്‍റ് എന്ന് അറിയപ്പെടും. ചന്ദ്രയാന്‍ 2 ക്രാഷ് ലാന്‍ഡ് ചെയ്ത സ്ഥലത്തിന് “തിരംഗാ പോയിന്‍റ്’ എന്ന് പേരിട്ടതായും പ്രധാനമന്ത്രി അറിയിച്ചു. ചന്ദ്രയാന്‍ 3 ദൗത്യത്തിന്‍റെ വിജയം ഓരോ ഇന്ത്യക്കാരനും സ്വന്തം നേട്ടം പോലെയാണ് ആഘോഷിച്ചത്. ഇത് വെറും നേട്ടമല്ല, ബഹിരാകാശത്തെ ഇന്ത്യയുടെ ശംഖനാദമാണ്. വലിയ സന്തോഷത്തിന്‍റെ നിമിഷങ്ങളാണിത്. ദേശീയ പ്രൗഡി ചന്ദ്രനോളം എത്തിച്ചു. നേട്ടത്തിന് പിന്നില്‍ പ്രവര്‍ത്തിച്ച ശാസ്ത്രജ്ഞര്‍ക്ക് സല്യൂട്ടെന്നും മോദി പറഞ്ഞു.
