തിരച്ചിലിലും ആക്ഷൻ കമ്മറ്റിയിലും മുന്നിൽ ..തുവ്വൂർ സുജിത കേസിൽ വിഷ്ണു പെരുമാറിയത് സിബിഐ സീരീസ് കഥാപാത്രത്തെപ്പോലെ..

മലപ്പുറം: ഒരു തിരോധാനം ഉണ്ടാകുമ്പോൾ തിരച്ചിലിൽ മുന്നിൽ നിൽക്കുക, ആക്ഷൻ കമ്മറ്റിയുണ്ടാക്കി പ്രക്ഷോഭത്തിന്‌ ഒരുങ്ങുക..സിബിഐ സീരീസിൽ ജഗദീഷ് വില്ലനായ സേതുരാമയ്യർ സിബിഐ ചിത്രത്തിലെ കഥയല്ല ഇത്..തുവ്വൂരിൽ കൃഷി ഓഫീസിലെ താൽക്കാലിക ജീവനക്കാരി സുജിതയുടെ തിരോധാനം മുതൽ  കൊലപാതകക്കേസിൽ കസ്റ്റഡിയിലായ യൂത്ത് കോൺഗ്രസ് നേതാവ് വിഷ്ണു സമൂഹമധ്യത്തിൽ പകർത്തിയത് ഈ സിനിമാക്കഥയുടെ കാർബൺ കോപ്പിയാണ്. 

ഈ മാസം 11ന് കാണാതായ സുജിതയ്ക്കായി അന്വേഷണം നടക്കുമ്പോൾ, അതുമായി ബന്ധപ്പെട്ട വിശദാംശങ്ങൾ വിഷ്ണു ഫെയ്സ്ബുക്കിലൂടെ തുടർച്ചയായി പങ്കുവച്ചിരുന്നു. ഇതിനിടെയാണ്, സംശയത്തിന്റെ മുന വിഷ്ണുവിനു നേരെ തിരിഞ്ഞതും കസ്റ്റഡിയിലായതും. സുജിതയെ കാണാതായതുമായി ബന്ധപ്പെട്ട് ഈ മാസം 17ന് കരുവാരകുണ്ട് പൊലീസിന്റെ പേരിലുള്ള ഫെയ്സ്ബുക് പേജിൽ ‘കാണ്‍മാനില്ല’ എന്ന പേരിൽ അറിയിപ്പ് നൽകിയിരുന്നു. ഇത് ഉൾപ്പെടെ പങ്കുവച്ചും തിരച്ചിലിൽ സഹകരിച്ചും പൊതുപ്രവർത്തകൻ കൂടിയായ വിഷ്ണു സജീവമായിരുന്നുവെന്ന് നാട്ടുകാർ പറയുന്നു. ‘എല്ലാവരും പരമാവധി ഷെയർ ചെയ്യുക’ എന്ന കുറിപ്പു സഹിതം സുജിതയെ കാണാതായ വിവരം വിഷ്ണു ഈ മാസം 14നും പോസ്റ്റ് ചെയ്തിരുന്നു.

സുജിതയെ കാണാതായ സംഭവത്തിൽ ഇടപെടൽ ശക്തമാക്കുന്നതിനായി നാട്ടുകാർ ആക്ഷൻ കമ്മിറ്റി രൂപീകരിച്ചപ്പോൾ അവിടെയും സജീവമായിരുന്നു. ഈ വിഷ്ണുവിന്റെ വീട്ടുവളപ്പിൽ നിന്നാണ് സുജിതയുടെ ശരീരം കുഴിച്ചിട്ട നിലയിൽ കണ്ടെത്തിയത്.
കൊലപാതകത്തിനു പിന്നിൽ സാമ്പത്തിക കാരണങ്ങളെന്നാണ് പൊലീസ് കസ്റ്റഡിയിലുള്ള പ്രതി വിഷ്ണുവിന്റെ മൊഴി. കുടുംബശ്രീ പ്രവർത്തകയും കൃഷിഭവൻ താൽക്കാലിക ജീവനക്കാരിയുമായ സുജിതയും പഞ്ചായത്തിലെ താൽക്കാലിക ജീവനക്കാരനായ വിഷ്ണുവും അടുത്ത പരിചയക്കാരായിരുന്നു. സുജിതയുടെ ആഭരണം കവരാൻ കൂടിയാണ് കൊലപാതകം നടത്തിയതെന്നാണ് വിവരം. സുജിതയെ കാണാതാകുന്നതിനു മുൻപേ വിഷ്ണു പഞ്ചായത്തിലെ ജോലി ഉപേക്ഷിച്ചിരുന്നതായും പറയുന്നുണ്ട്. യൂത്ത് കോൺഗ്രസ് മണ്ഡലം സെക്രട്ടറിയാണ് വിഷ്ണു.

സുജിതയെ കാണാതാകുന്നതിനു തൊട്ടുമുൻപ് ഏറ്റവും ഒടുവിൽ അവരുടെ ഫോണിലേക്ക് എത്തിയ കോൾ വിഷ്ണുവിന്റേതായിരുന്നു. ഈ ഫോൺകോളിനു ശേഷം സുജിതയുടെ ഫോൺ സ്വിച്ച് ഓഫായി. പിന്നീട് വിഷ്ണുവിന്റെ ഫോണിൽനിന്നും കുറേ നേരത്തേക്ക് മറ്റു കോളുകളൊന്നും പോയിരുന്നില്ല. ഇത്തരം സൂചനകൾ കേന്ദ്രീകരിച്ച് നടത്തിയ അന്വേഷണത്തിലാണ് വിഷ്ണു കസ്റ്റഡിയിലായതും പിന്നീട് അറസ്റ്റ് ചെയ്തതും. സുജിതയുടെ കൊലപാതകവുമായി ബന്ധപ്പെട്ട് വിഷ്ണുവിനൊപ്പം കുടുംബാംഗങ്ങളും കസ്റ്റഡിയിലാണ്. വിഷ്ണുവിന്റെ പിതാവ് മുത്തു എന്ന കുഞ്ഞുണ്ണി, സഹോദരൻമാരായ വൈശാഖ്, വിവേക് (ജിത്തു), ഇവരുടെ സുഹൃത്ത് ഷിഹാൻ എന്നിവരാണ് കസ്റ്റഡിയിലുള്ളത്. സുജിതയെ കാണാതായ 11നു തന്നെയാണ് കൊലപാതകം നടന്നതെന്നാണ് വിവരം.