പ്രധാനമന്ത്രി നരേന്ദ്രമോദിയെ വധിക്കാൻ പദ്ധതിയിട്ട മൂന്നുപേര് ബിഹാറില് അറസ്റ്റില്
ലൈംഗിക കുറ്റവാളി ജെഫ്രി എപ്സ്റ്റീനുമായി ഒരു ബന്ധവുമില്ല : മെലാനിയ ട്രംപ്
April 10, 2026
കണ്ണൂരിൽ പൊലീസുകാരിയെ വീട്ടില് കയറി വെട്ടിക്കൊലപ്പെടുത്തിയ കേസ്; ഭര്ത്താവിന് മൂന്ന് ജീവപര്യന്തം തടവ് ശിക്ഷ
April 10, 2026
ന്യൂഡല്ഹി : പ്രധാനമന്ത്രി നരേന്ദ്രമോദിക്കെതിരെ വധിക്കാൻ പദ്ധതിയിട്ട മൂന്നുപേര് ബിഹാറില് അറസ്റ്റില്. ബക്സര് ജില്ലയില് നിന്നാണ് മൂന്നു യുവാക്കളെ പൊലീസ് പിടികൂടിയത്. ഇവര് ഡല്ഹിയിലെ പ്രധാനമന്ത്രിയുടെ ഓഫീസില് (പിഎംഒ) നിന്ന് രഹസ്യ വിവരങ്ങള് നേടാന് ശ്രമിച്ചെന്നും പൊലീസ് സൂചിപ്പിച്ചു.
ബക്സര് ജില്ലയിലെ ദുമ്രോണ് സബ് ഡിവിഷനിലെ സിമ്രി പൊലീസ് സ്റ്റേഷന് പരിധിയിലുള്ള ആശ പരാരി ഗ്രാമത്തില് നിന്നാണ് യുവാക്കളെ അറസ്റ്റ് ചെയ്തത്. വിദേശ രാജ്യങ്ങളുടെ രഹസ്യാന്വേഷണ ഏജന്സികളുമായി ബന്ധം പുലര്ത്തിയതായും അവര്ക്ക് രഹസ്യ വിവരങ്ങള് ചോര്ത്തി നല്കിയതായും ഇവര്ക്കെതിരെ കുറ്റം ചുമത്തിയിട്ടുണ്ട്.
അടുത്ത മൂന്ന് ആഴ്ചയ്ക്കുള്ളില് പ്രധാനമന്ത്രി മോദിയെ വധിക്കാൻ യുവാക്കള് ഗൂഢാലോചന നടത്തിയതെന്ന് പൊലീസ് ഉദ്യോഗസ്ഥര് പറഞ്ഞു. അറസ്റ്റിലായവരുടെ വീടുകളില് നടത്തിയ റെയ്ഡില് ഒരു ലാപ്ടോപ്പും മറ്റ് ഇലക്ട്രോണിക് ഉപകരണങ്ങളും പൊലീസ് കണ്ടെടുത്തു. രഹസ്യവിവരത്തിന്റെ അടിസ്ഥാനത്തില് സൈബര് കഫേ സെന്റര് നടത്തിയിരുന്ന അമന് കുമാര് അടക്കമുള്ളവരെ പൊലീസ് നിരീക്ഷിച്ചു വരികയായിരുന്നു.
യുവാക്കള് യുഎസ് രഹസ്യാന്വേഷണ ഏജന്സി സിഐഎയുമായി ബന്ധപ്പെട്ടിരുന്നതായി സൂചന ലഭിച്ചു. പ്രതികളുടെ മുന്കാല ചരിത്രം പരിശോധിച്ചു വരികയാണ്. അമന് നേരത്തെ ഒരു സൈബര് തട്ടിപ്പ് കേസില് അറസ്റ്റിലായിട്ടുണ്ടെന്ന് വ്യക്തമായിട്ടുണ്ട്. കൂടുതല് ചോദ്യം ചെയ്യുന്നതിലൂടെ ഇവരുടെ വിദേശബന്ധങ്ങളെക്കുറിച്ച് കൂടുതല് വിവരങ്ങള് ലഭിക്കുമെന്ന് പൊലീസ് സൂപ്രണ്ട് പറഞ്ഞു. പിടിച്ചെടുത്ത ഇലക്ട്രോണിക് ഉപകരണങ്ങള് ഫോറന്സിക് പരിശോധനയ്ക്ക് അയച്ചിരിക്കുകയാണ്.
കൊല്ക്കത്ത അന്താരാഷ്ട്ര വിമാനത്താവളത്തിലെ കമ്പ്യൂട്ടറുകള് ഹാക്ക് ചെയ്യുമെന്ന് ഭീഷണിപ്പെടുത്തിയതിന് 2022 ല് അമനെ അറസ്റ്റ് ചെയ്തതായി അന്വേഷണ ഉദ്യോഗസ്ഥന് സൂചിപ്പിച്ചു. അമന്റെ മുറി പൊലീസ് സീല് ചെയ്തിരിക്കുകയാണ്. എന്നാല് മകന് നിയമവിരുദ്ധ പ്രവര്ത്തനങ്ങളില് പങ്കില്ലെന്ന് അമന്റെ മാതാപിതാക്കളായ ഗണേഷ് തിവാരിയും ഗീതാ കുമാരിയും പറയുന്നു. മകനെ പൊലീസ് കസ്റ്റഡിയിലെടുത്ത കുറ്റം എന്താണെന്ന് അറിയില്ലെന്ന് മാതാപിതാക്കൾ പറഞ്ഞു.
