വാല്പാറയില് കരടി ആക്രമണം; തേയിലത്തോട്ട തൊഴിലാളിക്ക് ഗുരുതര പരിക്ക്
ബോർഡ് ഓഫ് സ്റ്റഡീസിലേക്ക് ചട്ടങ്ങൾ മറികടന്ന് നിയമനം; അസാധാരണ നീക്കവുമായി കേരളാ വിസി
June 27, 2026
ഇന്ഡിഗോ ലോഞ്ചിൽ അറിയിപ്പ് നൽകിയില്ല; പിണറായിയുടെ ഡല്ഹി- കോഴിക്കോട് യാത്ര മുടങ്ങി
June 27, 2026
തൃശൂര്: വാല്പാറയില് കരടിയുടെ ആക്രമണത്തില് തേയിലത്തോട്ട തൊഴിലാളിക്ക് ഗുരുതര പരിക്ക്. ഉത്തരേന്ത്യന് തൊഴിലാളിയായ ദില്വാര് അലിക്കാണ് പരിക്കേറ്റത്. അപ്പര് പരലൈ എസ്റ്റേറ്റില് തേയിലച്ചെടികള്ക്ക് മരുന്ന് തളിക്കുന്നതിനിടെയായിരുന്നു ആക്രമണം. ഈ സമയം അഞ്ച് തൊഴിലാളികളാണ് ജോലിയില് ഉണ്ടായിരുന്നത്.
തോട്ടത്തില് ഒളിച്ചിരുന്ന കരടി ദില്വാര് അലിയെ ആക്രമിക്കുകയായിരുന്നു. തലയില് പരിക്കേറ്റ് തൊഴിലാളിയുടെ നിലവിളി കേട്ട് ഒപ്പമുണ്ടായിരുന്നവര് ബഹളംവെച്ച് കരടിയെ വനമേഖലയിലേക്ക് ഓടിച്ചുവിട്ടു. പരിക്കേറ്റ ദില്വാര് അലിയെ ആദ്യം വാല്പാറ സര്ക്കാര് ആശുപത്രിയില് പ്രവേശിപ്പിച്ച ശേഷം വിദഗ്ധ ചികിത്സയ്ക്കായി കോയമ്പത്തൂര് സര്ക്കാര് മെഡിക്കല് കോളജ് ആശുപത്രിയിലേക്ക് മാറ്റി.
ആനമല കടുവ സങ്കേതത്തിന്റെ ഭാഗമായ വാല്പാറയില് കരടി ഉള്പ്പെടെയുള്ള വന്യജീവികളുടെ സാന്നിധ്യം അടുത്തിടെ വര്ധിച്ചതായി വനംവകുപ്പ് അറിയിച്ചു. വാട്ടര്ഫോള്, കവര്കല്, റോട്ടിക്കട, അയ്യര്പാടി തുടങ്ങിയ മേഖലകളില് കരടികളുടെ സാന്നിധ്യം കൂടുതലായതിനാല് തേയിലത്തോട്ട തൊഴിലാളികള് അതീവ ജാഗ്രത പാലിക്കണമെന്ന് വനംവകുപ്പ് നിര്ദേശം നല്കി. കഴിഞ്ഞ ഏതാനും വര്ഷങ്ങളായി കരടി ആക്രമണങ്ങള് വര്ധിച്ചുവരുന്നതായും അധികൃതര് അറിയിച്ചു.
