കേരള ഹൈക്കോടതിയിലെ ഏഴ് അഡീഷണല്‍ ജഡ്ജിമാരെ സ്ഥിരം ജഡ്ജിമാരാക്കാന്‍ ശുപാര്‍ശ ചെയ്ത് സുപ്രീംകോടതി കൊളീജിയം

ന്യൂഡല്‍ഹി : കേരള ഹൈക്കോടതിയിലെ ഏഴ് അഡീഷണല്‍ ജഡ്ജിമാരെ സ്ഥിരം ജഡ്ജിമാരാക്കാന്‍ ശുപാര്‍ശ. സുപ്രീംകോടതി ചീഫ് ജസ്റ്റിസ് സൂര്യകാന്തിന്റെ അധ്യക്ഷതയില്‍ ചേര്‍ന്ന കൊളീജിയമാണ് ശുപാര്‍ശ നല്‍കിയത്. ഇന്നലെ ചേര്‍ന്ന കൊളീജിയത്തിന്റേതാണ് ശുപാര്‍ശ.

ജസ്റ്റിസ് എം എ അബ്ദുള്‍ ഹക്കീം, ജസ്റ്റിസ് വി ശ്യാം കുമാര്‍, ജസ്റ്റിസ് ഹരിശങ്കര്‍ വി മേനോന്‍, ജസ്റ്റിസ് മനു ശ്രീധരന്‍ നായര്‍, ജസ്റ്റിസ് ഈശ്വരന്‍ സുബ്രമണി, ജസ്റ്റിസ് മനോജ് പി എം, ജസ്റ്റിസ് എം ബി സ്‌നേഹലത എന്നിവരെയാണ് സ്ഥിരം ജഡ്ജിമാരാക്കുന്നത്.

ആറു ജഡ്ജിമാര്‍ 2024 മാര്‍ച്ച് 22 നാണ് ഹൈക്കോടതിയില്‍ അഡീഷണല്‍ ജഡ്ജിമാരായി നിയമിതരാകുന്നത്. ജസ്റ്റിസ് എം ബി സ്‌നേഹലത 2024 ഏപ്രില്‍ 25 നും നിയമിതയായി. പുതിയ ശുപാര്‍ശ അംഗീകരിക്കപ്പെടുന്നതോടെ കേരള ഹൈക്കോടതിയിലെ സ്ഥിരം ജഡ്ജിമാരുടെ എണ്ണം 35 ആകും. 5 അഡീഷണല്‍ ജഡ്ജിമാരുമുണ്ട്.