മോൻസന് അനൂപ് 25 ലക്ഷം നൽകിയത് സുധാകരന്റെ സാന്നിധ്യത്തിൽ, സുധാകരന് 10 ലക്ഷം എണ്ണി നല്‍കിയതിനു സാക്ഷികളുണ്ടെന്നും ക്രൈംബ്രാഞ്ച്

തിരുവനന്തപുരം: മോന്‍സന്‍ മാവുങ്കല്‍ മുഖ്യപ്രതിയായ പുരാവസ്തു തട്ടിപ്പു കേസില്‍ കെപിസിസി പ്രസിഡന്റ് കെ സുധാകരനെതിരെ ശക്തമായ തെളിവുകളുണ്ടെന്ന് ക്രൈംബ്രാഞ്ച്. വഞ്ചനാക്കേസില്‍ സുധാകരനെതിരെ ശക്തമായ തെളിവുണ്ട്. മോന്‍സനില്‍ നിന്നും സുധാകരന്‍ 10 ലക്ഷം രൂപ വാങ്ങിയതിന് ദൃക്‌സാക്ഷികളുണ്ടെന്നും അന്വേഷണ സംഘം വ്യക്തമാക്കുന്നു. 

മോന്‍സന്‍ മാവുങ്കലിന്റെ മൂന്നു ജീവനക്കാരുടെ രഹസ്യ മൊഴി രേഖപ്പെടുത്തിയിട്ടുണ്ട്. സുധാകരന് 10 ലക്ഷം എണ്ണി നല്‍കിയെന്നാണ് കോടതിയില്‍ മൊഴി നല്‍കിയിട്ടുള്ളത്. സുധാകരന്‍ പണം കൈപ്പറ്റുമ്പോള്‍ ഇവര്‍ അവിടെ ഉണ്ടായിരുന്നുവെന്നാണ് ക്രൈംബ്രാഞ്ച് പറയുന്നത്.  മോന്‍സന്‍ മാവുങ്കലിന്റെ പുരാവസ്തു സാമ്പത്തിക തട്ടിപ്പ് കേസില്‍ കെ സുധാകരനെ രണ്ടാം പ്രതിയായി ചേര്‍ത്താണ് ക്രൈംബ്രാഞ്ച് എറണാകുളം സി ജെ എം കോടതിയില്‍ റിപ്പോര്‍ട്ട് നല്‍കിരിക്കുന്നത്. തങ്ങളിൽ നി​ന്ന് മോൻസൺ​ പത്ത് കോടി​യോളം രൂപ പല ഘട്ടങ്ങളിലായി തട്ടി​യെടുത്തെന്ന് കോഴി​ക്കോട് മാവൂർ ചെറുവാടി​ യാക്കൂബ് പുരയി​ൽ, അനൂപ് വി​.അഹമ്മദ്, എം.ടി​.ഷമീർ, സി​ദ്ധി​ഖ് പുരയി​ൽ, ഇ.എ.സലിം, ഷാനി​മോൻ എന്നി​വർ നൽകിയ പരാതിയിലാണ് 2021 സെപ്തംബറി​ൽ ക്രൈംബ്രാഞ്ച് കേസെടുത്തത്. സുധാകരന്റെ സാന്നിദ്ധ്യത്തിൽ താൻ 25 ലക്ഷം രൂപ മോൻസണ് നൽകി​യെന്ന് അനൂപി​ന്റെ മൊഴി​യുണ്ട്. ഈ തുകയി​ൽ പത്ത് ലക്ഷം രൂപ സുധാകരന് കൈമാറുന്നത് കണ്ടെന്നാണ് മോൻസണിന്റെ മുൻ ഡ്രൈവർ അജിത്തും ജീവനക്കാരായ ജെയ്‌സണും ജോഷിയും മൊഴി​ നൽകി​യത്.

പുരാവസ്തുക്കൾ വി​ദേശി​കൾക്ക് വി​റ്റ വകയി​ൽ ബാങ്കിൽ കുടുങ്ങിക്കിടക്കുന്ന 2.62 ലക്ഷം കോടി രൂപ ലഭിക്കാനുണ്ടെന്നും അത് ശരി​യാക്കാൻ പണം വേണമെന്നും പറഞ്ഞാണ് മോൻസൺ​ പരാതി​ക്കാരെ കബളി​പ്പി​ച്ചത്. ഇതി​നായി​ എച്ച്.എസ്.ബി​.സി​ ബാങ്കി​ന്റെ വ്യാജ അക്കൗണ്ട് സ്റ്റേറ്റ്മെന്റുകളും കാണി​ച്ചു. ബാങ്കി​ൽ കുടുങ്ങി​ക്കി​ടക്കുന്ന പണം മോൻസണിന് ലഭി​ക്കാൻ ഇടപെടാമെന്ന്‌ തങ്ങളുടെ സാന്നിദ്ധ്യത്തിൽ സുധാകരൻ ഉറപ്പു നൽകിയെന്നും പരാതിക്കാർ മൊഴി​ നൽകി​യി​രുന്നു. കെ.സുധാകരൻ മോൻസണിന്റെ കലൂരി​ലെ വീട്ടി​ൽ പത്ത് ദി​വസം കോസ്‌മറ്റോളജി ചികിത്സ നടത്തിയതായും പരാതിക്കാർ ആരോപിച്ചിരുന്നു.

പരാതിക്കാർ മുഖ്യമന്ത്രിക്കടക്കം നൽകിയ പരാതിയിൽ കെ. സുധാകരന്റെ പേരുണ്ടായിരുന്നു. അതുകൊണ്ടുതന്നെ സുധാകരനെ ചോദ്യം ചെയ്താലേ കൂടുതല്‍ വിവരങ്ങള്‍ പുറത്തുവരുകയുള്ളൂവെന്നും ക്രൈംബ്രാഞ്ച് വ്യക്തമാക്കുന്നു. സുധാകരന് എതിരായി ഉയര്‍ന്ന് വന്നിട്ടുള്ള എല്ലാ ആരോപണങ്ങളും അന്വേഷിക്കുകയാണെന്നും കൂടുതല്‍ വിവരങ്ങള്‍ പുറത്തുവരേണ്ടതുണ്ടെന്നും ക്രൈംബ്രാഞ്ച് സൂചിപ്പിക്കുന്നു. ചോദ്യം ചെയ്യലിനായി നാളെ കളമശ്ശേരി ഓഫീസില്‍ ഹാജരാകണമെന്ന് ആവശ്യപ്പെട്ട് ക്രൈംബ്രാഞ്ച് കെ സുധാകരന് നോട്ടീസ് നല്‍കിയിട്ടുണ്ട്. കേസില്‍ സുധാകരനെതിരെ വഞ്ചനാക്കുറ്റമാണ് ചുമത്തിയിട്ടുള്ളത്. രണ്ടാം പ്രതിയാക്കിയതിന് പിന്നാലെ സുധാകരന്‍ നിയമോപദേശം തേടി. ഇന്ന് ഹൈക്കോടതിയില്‍ കെ സുധാകരന്‍ ഹര്‍ജി നല്‍കുമെന്നാണ് വിവരം.  കേസിനെ നിയമപരമായും രാഷ്ട്രീയമായും നേരിടാനാണ് കോൺ​ഗ്രസിന്റെ തീരുമാനം.

സുധാകരനെതി​രെ ചുമത്തി​യ വകുപ്പുകൾ

ഐ.പി​.സി​. 420 : സാമ്പത്തി​ക തട്ടി​പ്പ്

ഐ.പി​.സി​. 468 : ചതി​ക്കാനായി​ വ്യാജരേഖകൾ ചമയ്ക്കൽ

ഐ.പി​.സി​. 471 : വ്യാജരേഖ അസൽരേഖയായി​ കാണി​ച്ച് ചതി​ക്കൽ.