ഡൽഹി സ്കൂളുകളിലെ ബോംബ് ഭീഷണി : പിന്നിൽ വിദ്യാർഥികൾ, ലക്ഷ്യം പരീക്ഷ മാറ്റിവെക്കൽ

ന്യൂഡൽഹി : ഡൽഹിയിലെ മൂന്ന് സ്കൂളുകൾക്ക്​ നേരെയുണ്ടായ ബോംബ് ഭീഷണികൾക്ക് പിന്നിൽ വിദ്യാർഥികളെന്ന് പൊലീസ്. പരീക്ഷ മാറ്റിവെക്കാനും സ്കൂൾ അടച്ചിടാനുമാണ് ഇങ്ങനെ ചെയ്തതെന്നാണ് വിശദീകരണം. ബോംബ് ഭീഷണി ലഭിച്ച വെങ്കടേശ്വര ​ഗ്ലോബൽ സ്കൂൾ കേന്ദ്രീകരിച്ചായിരുന്നു പൊലീസ് അനേഷ്വണം. പ്രശാന്ത് വിഹാറിൽ നവംബർ 28നുണ്ടായ സ്ഫോടനത്തിന് ശേഷമാണ് ഇവിടെ ഇ-മെയിൽ ഭീഷണി വന്നത്. എന്നാൽ, അന്വേഷണത്തിനൊടുവിൽ ഇതിന് പിന്നിൽ വിദ്യാഥികളാണെന്ന്​ ​പൊലീസ്​ കണ്ടെത്തി.

പരീക്ഷ മാറ്റിവെക്കാൻ വേണ്ടി രണ്ട് സഹോദരങ്ങൾ ചേർന്നാണ് ഇത്തരമൊരു ഭീഷണി സ്കൂളിലേക്കയച്ചത്. കൂടുതൽ പരിശോധനയിൽ മുമ്പുണ്ടായ ബോംബ് ഭീഷണികളിൽനിന്നാണ് കുട്ടികൾക്ക് ഇത്തരമൊരു ആശയം കിട്ടിയതെന്ന്​ മനസ്സിലായി. കുട്ടികളെ കൗൺസലിംഗിന് ശേഷം രക്ഷിതാക്കളോടൊപ്പം വിട്ടയച്ചു. രക്ഷിതാക്കൾക്ക് ഇതുസംബന്ധിച്ച് താക്കീതും നൽകി.

കൂടുതൽ പരിശോധനയിൽ രോഹിണിയിലും പശ്ചിം വിഹാറിലുമുള്ള രണ്ട് സ്കൂളുകളിലും സമാന രീതിയിലാണ്​ ഭീഷണി സന്ദേശം വന്നിട്ടുള്ളതെന്ന്​ മനസ്സിലായി​. സ്കൂളുകൾ അടക്കാൻ വേണ്ടി വിദ്യാത്ഥികൾ ചേർന്ന് അയച്ചതാണ് ഇ-മെയിൽ സന്ദേശങ്ങൾ.

11 ദിവസത്തിനിടെ ഡൽഹിയിലെ 100ലധികം സ്കൂളുകളിലേക്കാണ് ഭീഷണി സന്ദേശം വന്നത്. ഇത്തരം സന്ദേശങ്ങൾ വിപിഎൻ ഉപയോഗിച്ച് അയച്ചിരിക്കുന്നതുകൊണ്ടാണ് പ്രതികളിലേക്ക് എത്താൻ വൈകുന്നതെന്ന്​ പൊലീസ്​ പറയുന്നു.