ഒളിപ്പിക്കാനായില്ല, നിഖിൽ തോമസിന്റെ വ്യാ​ജ ബി​രു​ദ സ​ർട്ടിഫി​ക്ക​റ്റു​ക​ൾ പൊലീസ് ക​ണ്ടെ​ടു​ത്തു

ആ​ല​പ്പു​ഴ: എ​സ്എ​ഫ്ഐ മു​ൻ ഏ​രി​യ സെ​ക്ര​ട്ട​റി നി​ഖി​ൽ തോ​മ​സ് എം​കോം പ്ര​വേ​ശ​ത്തി​നാ​യി കോ​ള​ജി​ൽ സ​മ​ർ​പ്പി​ച്ച വ്യാ​ജ ബി​രു​ദ സ​ർ​ട്ട​ഫി​ക്ക​റ്റു​ക​ൾ നി​ഖി​ലി​ന്‍റെ വീ​ട്ടി​ൽ നി​ന്നു പൊലീസ്  ക​ണ്ടെ​ടു​ത്തു. കാ​യം​കു​ളം മാ​ർ​ക്ക​റ്റി​നു സ​മീ​പ​ത്തെ വീ​ട്ടി​ൽ ന​ട​ത്തി​യ റെ​യ്ഡി​ലാ​ണ് വ്യാ​ജ ഡി​ഗ്രി സ​ർ​ട്ടി​ഫി​ക്ക​റ്റു​ക​ൾ ക​ണ്ടെ​ത്തി​യ​ത്.

ക​ലിം​ഗ സ​ർ​വ​ക​ലാ​ശാ​ല​യു​ടെ പേ​രി​ലു​ള്ള വ്യാ​ജ ബി​കോം സ​ർ​ട്ടി​ഫി​ക്ക​റ്റു​ക​ളാ​ണ് ക​ണ്ടെ​ത്തി​യ​ത്. ബി​കോം (ബാ​ങ്കിം​ഗ് ആ​ൻ​ഡ് ഫി​നാ​ൻ​സ്) എ​ന്നു രേ​ഖ​പ്പെ​ടു​ത്തി​യ ബി​രു​ദ സ​ർ​ട്ടി​ഫി​ക്ക​റ്റി​നൊ​പ്പം മൂ​ന്നു വ​ർ​ഷ​ത്തെ മാ​ർ​ക്ക് ലി​സ്റ്റ്, മൈ​ഗ്രേ​ഷ​ൻ സ​ർ​ട്ട​ഫി​ക്ക​റ്റ് തു​ട​ങ്ങി​യ​വ​യു​മു​ണ്ടാ​യി​രു​ന്നു. ബി​കോം ഫ​സ്റ്റ് ക്ലാ​സി​ൽ പാ​സാ​യെ​ന്നാ​ണ് മാ​ർ​ക്ക് ലി​സ്റ്റ്. നി​ഖി​ലി​ന്‍റെ മു​റി​യി​ലെ അ​ല​മാ​ര​യി​ലാ​യി​രു​ന്നു സ​ർ​ട്ടി​ഫി​ക്ക​റ്റു​ക​ൾ. പെ​ട്ടെ​ന്ന് ഒ​ളി​വി​ൽ പോ​കേ​ണ്ടി വ​ന്ന​തി​നാ​ൽ ഇ​ത് ഒ​ളി​പ്പി​ക്കാ​നാ​യി​ല്ല. നി​ഖി​ലി​ന്റെ അ​ക്കൗ​ണ്ട് വി​വ​ര​ങ്ങ​ളും പൊലീസ്  ശേ​ഖ​രി​ച്ചു.‌ അ​തേ​സ​മ​യം, വ്യാ​ജ രേ​ഖ ച​മ​ച്ച കൊ​ച്ചി​യി​ലെ വി​ദേ​ശ മാ​ൻ​പ​വ​ർ റി​ക്രൂ​ട്ട്മെ​ന്‍റ് ഏ​ജ​ൻ​സി​യി​ൽ ഇ​ന്ന് തെ​ളി​വെ​ടു​ത്തേ​ക്കും.

കോ​ട്ട​യം ബ​സ് സ്റ്റാ​ൻ​ഡി​ൽ നി​ന്ന് ശ​നി​യാ​ഴ്ച പു​ല​ർ​ച്ചെ​യാ​ണ്നിഖിലിനെ പൊലീസ്  പി​ടി​കൂ​ടി​യ​ത്. വ്യാ​ജ സ​ർ​ട്ടി​ഫി​ക്ക​റ്റ് റെ​ഡി​യാ​ക്കി ത​ന്ന​തി​ന് മു​ൻ എ​സ്എ​ഫ് ഐ ​നേ​താ​വ് അ​ബി​ൻ സി. ​രാ​ജു​വി​ന് ര​ണ്ടു ല​ക്ഷം രൂ​പ​യും ന​ൽ​കി​യ​താ​യി നി​ഖി​ൽ മൊ​ഴി ന​ൽ​കി​യി​രു​ന്നു. അ​ബി​ന്‍റെ അ​മ്മ​യു​ടെ അ​ക്കൗ​ണ്ട് വ​ഴി​യാ​യി​രു​ന്നു പ​ണം കൈ​മാ​റി​യ​തെ​ന്ന്  പൊലീസ്  ക​ണ്ടെ​ത്തി​യി​രു​ന്നു.അ​തേ​സ​മ​യം, നി​ഖി​ലി​ന്‍റെ മൊ​ബൈ​ൽ ഫോ​ൺ ഇ​തു​വ​രെ ക​ണ്ടെ​ത്താ​നാ​യി​ല്ല. ഒ​ളി​വി​ൽ ക​ഴി​ഞ്ഞ​പ്പോ​ൾ കൈ​യി​ലെ പ​ണം മു​ഴു​വ​ൻ തീ​ർ​ന്നെ​ന്നും മൊ​ബൈ​ൽ ഫോ​ൺ ഓ​ട​യി​ൽ എ​റി​ഞ്ഞെ​ന്നു​മാ​ണ് നി​ഖി​ൽ പ​റ​യു​ന്ന​ത്.