ടൈഗർ മുത്തുവേൽ പാണ്ഡ്യനായി രജനികാന്ത് എത്തിയ ജയിലർ പടയോട്ടം തുടരുന്നു. ഫാൻസുകാർക്ക് മാത്രമല്ല സിനിമാ പ്രേമികള്ക്കൊട്ടാകെ ഉത്സവപ്രതീതി സമ്മാനിക്കുകയാണ് ചിത്രം. ഓഗസ്റ്റ് പത്തിന് തിയേറ്ററുകളിലെത്തിയ ചിത്രം നാല് ദിനം പിന്നിടുമ്പോൾ ആഗോള ബോക്സോഫീസിൽ 300 കോടി ക്ലബ്ബിൽ ഇടം നേടിയതായാണ് റിപ്പോർട്ട്. ട്രേഡ് അനലിസ്റ്റ് രമേശ് ബാലയാണ് കളക്ഷൻ സംബന്ധിച്ച് ട്വീറ്റ് ചെയ്തിരിക്കുന്നത്. 300 കോടി ക്ലബ്ബിൽ എത്തുന്ന നാലാമത്തെ രജനി ചിത്രം കൂടിയാണ് ജയിലർ. ‘എന്തിരൻ’, ‘കബാലി’, 2.O എന്നിവയാണ് മുമ്പ് 300 കോടി കടന്ന രജനി സിനിമകൾ. ഇന്ത്യയിൽ നിന്ന് മാത്രം ചിത്രം നൂറ് കോടി കടന്നിട്ടുണ്ട്. 146 കോടി രൂപ ചിത്രം ഇതുവരെ ഇന്ത്യയിൽ നിന്ന് നേടിയെന്നാണ് റിപ്പോർട്ടുകൾ.
റിട്ടയേർഡ് പോലീസ് ഓഫീസറായ ടൈഗർ മുത്തുവേൽ പാണ്ഡ്യൻ എന്ന കഥാപാത്രമായി രജനികാന്തിന്റെ വൺമാൻ ഷോ തന്നെയാണ് ‘ജയിലർ’ എന്നാണ് പ്രേക്ഷകർ പറയുന്നത്. പ്രതിനായക വേഷത്തിൽ എത്തിയ വിനായകനും ഞെട്ടിക്കുന്ന പ്രകടനമാണ് കാഴ്ചവെച്ചിരിക്കുന്നത്. കാമിയോ റോളിലെത്തിയ മോഹൻലാൽ, ശിവരാജ്കുമാർ, ജാക്കി ഷ്രോഫ് എന്നിവരുടെ പ്രകടനവും ശ്രദ്ധ നേടി. മോഹൻലാൽ അവതരിപ്പിക്കുന്ന മാത്യൂസ് എന്ന കഥാപാത്രത്തിന്റെ ഓരോ രംഗവും തിയേറ്ററുകളിൽ ആരവമുയർത്തുന്നുണ്ട്. ആറ് കോടിക്ക് അടുത്താണ് കേരളത്തില് നിന്ന് മാത്രം റിലീസ് ദിവസത്തില് ‘ജയിലര്’ നേടിയതെന്നാണ് വിവരങ്ങൾ. ഒരു ഫൺ ആക്ഷൻ പാക്ക്ഡ് സിനിമയാണ് ‘ജയിലർ’.
ചിത്രത്തിലെ മറ്റ് താരങ്ങളായ രമ്യാ കൃഷ്ണന്, വസന്ത് രവി, സുനില്, കിഷോര്, തമന്ന, ജി മാരിമുത്ത് തുടങ്ങിയവരും കഥാഗതിയെ സ്വാധീനിക്കുന്ന വേഷങ്ങളിലാണ് ചിത്രത്തിൽ എത്തിയിരിക്കുന്നത്. അനിരുദ്ധിന്റെ സംഗീതമാണ് ചിത്രത്തിലെ മറ്റൊരു പ്രധാന ഘടകം. മാസ് രംഗങ്ങളിലും അതോടൊപ്പം തന്നെ ഇമോഷണല് രംഗങ്ങളിലും ഏറെ മികവുപുലർത്തുന്ന പശ്ചാത്തല സംഗീതമാണ് അനിരുദ്ധ് നൽകിയിട്ടുള്ളത്. ഓരോ രംഗങ്ങൾക്കും ചേർന്ന രീതിയിലുള്ള മികവുറ്റ ഗാനങ്ങളും സിനിമയിലുണ്ട്. വിജയ് കാർത്തിക് കണ്ണന്റെ ഛായാഗ്രഹണവും മികച്ചുനിന്നു. സ്റ്റണ്ട് ശിവയൊരുക്കിയ ആക്ഷൻ സീനുകളും ത്രസിപ്പിക്കുന്നതാണ്. ആകെ മൊത്തത്തിൽ തിയേറ്ററില് ആഘോഷിക്കാന് സാധിക്കുന്നൊരു എന്റര്ടെയ്നറാണ് നെൽസൺ രജനി ആരാധകർക്ക് സമ്മാനിച്ചിരിക്കുന്നത്. സൺ പിക്ചേഴ്സിന്റെ ബാനറിൽ കലാനിധി മാരൻ നിർമിച്ച ‘ജയിലർ’ ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ ആണ് കേരളത്തിൽ ചിത്രം വിതരണത്തിനെത്തിച്ചിരിക്കുന്നത്. ഡ്രീം ബിഗ് ഫിലിംസാണ് ചിത്രത്തിന്റെ ഡിസ്ട്രിബ്യൂഷൻ പാർട്ണർ.