പരാ​ഗ് 2.0; രാജസ്ഥാന് സീസണിലെ രണ്ടാം ജയം

ജയ്പൂർ: രാജസ്ഥാൻ റോയൽസ് താരം റിയാൻ പരാ​ഗിന്റെ തകർപ്പൻ ബാറ്റിങ്ങിന്റെ കരുത്തിൽ ഐപിഎല്ലിൽ രാജസ്ഥാന് രണ്ടാം ജയം. ഡൽഹി ക്യാപിറ്റൽസിനെ 12 റൺസിനാണ് തോൽപ്പിച്ചത്. 186 റൺസ് വിജയ ലക്ഷ്യം പിന്തുടർന്ന ഡൽഹി ക്യാപിറ്റൽസിന് 20 ഓവറിൽ അഞ്ചു വിക്കറ്റ് നഷ്ടത്തിൽ 173 റൺസെടുക്കാൻ മാത്രമാണു സാധിച്ചുള്ളൂ. രണ്ടാം വിജയവുമായി പോയിന്റു പട്ടികയിൽ രണ്ടാം സ്ഥാനത്താണു രാജസ്ഥാൻ. രണ്ടു കളികളും തോറ്റ ഡൽഹി എട്ടാമതാണ്.

അർധ സെഞ്ചറി നേടിയ റിയാൻ പരാഗിന്റെ കരുത്തിലാണ് രാജസ്ഥാൻ 185 റൺസിലെത്തിയത്. 45 പന്തുകൾ ആറു സിക്സുകളും ഏഴു ഫോറുമടക്കം 84 റൺസാണ് താരം നേടിയത്. യശസ്വി ജയ്സ്വാൾ, ജോസ് ബട്‍ല‍‍‍ർ, സഞ്ജു സാംസൺ എന്നിവർ നിരാശപ്പെടുത്തിയെങ്കിലും പ്രൊമോഷൻ ലഭിച്ച് ബാറ്റിങ്ങിനിറങ്ങിയ ആർ. അശ്വിന് മൂന്ന് സിക്സ് അടക്കം 29 റൺസെടുത്തു.

34 പന്തിൽ 49 റൺസെടുത്ത ഡേവിഡ് വാർണറാണ് ഡൽഹിയുടെ ടോപ് സ്കോറർ. ട്രിസ്റ്റൻ സ്റ്റബ്സ് 23 പന്തിൽ 44 റൺസുമായി പുറത്താകാതെനിന്നു. മിച്ചൽ മാർഷ് (12 പന്തിൽ 23), ഋഷഭ് പന്ത് (26 പന്തിൽ 28), അക്ഷർ‍ പട്ടേൽ (13 പന്തിൽ 15) എന്നിവരാണ് ‍ഡൽഹിയുടെ മറ്റ് പ്രധാന സ്കോറർമാർ.