പത്തനംതിട്ടയിലും ഇടുക്കിയിലും ഇന്ന്‌ അതിശക്ത മഴ, നാലുജില്ലകളിൽ യെല്ലോ അലർട്ട്

തിരുവനന്തപുരം: ബംഗാൾ ഉൾക്കടലിലെ ചക്രവാതച്ചുഴി ഇന്ന് ന്യൂനമർദമായി ശക്തിപ്രാപിക്കാൻ സാധ്യത.  സംസ്ഥാനത്ത്‌ അതിശക്ത മഴയുണ്ടാകും. ഇന്ന് പത്തനംതിട്ട, ഇടുക്കി ജില്ലകളിൽ ഓറഞ്ച്‌ അലർട്ട്‌ (അതിശക്ത മഴ)പ്രഖ്യാപിച്ചിട്ടുണ്ട്. ഒറ്റപ്പെട്ട സ്ഥലങ്ങളിൽ 204.4 മി.മീ. വരെ മഴ പ്രതീക്ഷിക്കാം.

ആലപ്പുഴ, കോട്ടയം, എറണാകുളം, തൃശൂർ ജില്ലകളിൽ മഞ്ഞ അലർട്ടാണ്‌ (ശക്തമായ മഴ). മറ്റു ജില്ലകളിൽ നേരിയ മഴ തുടരും. മലയോര മേഖലകളിൽ ജാഗ്രതാ നിർദേശം നൽകി. സംസ്ഥാനത്ത്‌ കാലവർഷം വീണ്ടും ശക്തമായേക്കും. വടക്കൻ കേരളത്തിലേക്കു കൂടി മഴ വ്യാപിക്കും. സെപ്‌തംബറിലെ ആദ്യ നാലുദിവസം സംസ്ഥാനത്ത്‌ 60 മി.മീ മഴ ലഭിച്ചു. ആഗസ്‌തിൽ 31 ദിവസംകൊണ്ട്‌ ആകെ ലഭിച്ചത്‌ 60 മി.മീ മഴയായിരുന്നു.