വടക്കൻ കേരളത്തിൽ ശക്തമായ മഴ തുടരും, 9 ജില്ലയിൽ ഇന്നും നാളെയും യെല്ലോ അലർട്ട്‌
കണ്ണൂര്‍ ജില്ലയിലും ഇന്ന് വിദ്യാലയങ്ങള്‍ക്ക് അവധി
July 24, 2023
എല്ലാ ടിക്കറ്റിലും 46 കിലോ ഇല്ല, ബാഗേജ് നയത്തില്‍ ഗള്‍ഫ് എയര്‍ മാറ്റം വരുത്തി
July 24, 2023
തിരുവനന്തപുരം : വടക്കൻ കേരളത്തിൽ ശക്തമായ മഴ തുടരുമെന്നും മധ്യ, തെക്കൻ കേരളത്തിലേക്കും മഴ വ്യാപിക്കുമെന്നും കേന്ദ്ര കാലാവസ്ഥാ വകുപ്പ്‌. ഒമ്പത്‌ ജില്ലയിൽ തിങ്കളും ചൊവ്വയും യെല്ലോ അലർട്ട്‌ (ശക്തമായ മഴ) പ്രഖ്യാപിച്ചു. ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിലാണ്‌ മഞ്ഞ അലർട്ട്‌.
ഇവിടെ 24 മണിക്കൂറിൽ 64.5 മില്ലിമീറ്ററിൽ മുതൽ 115.5 മില്ലിമീറ്റർ വരെ മഴ ലഭിച്ചേക്കും. മറ്റു ജില്ലകളിലും മഴയ്‌ക്ക്‌ സാധ്യതയുണ്ട്‌.മലപ്പുറം, കോഴിക്കോട്, വയനാട്, കണ്ണൂർ, കാസർകോട്‌ ജില്ലകളിൽ ബുധൻ, വ്യാഴം ദിവസങ്ങളിലും മഞ്ഞ അലർട്ട്‌ പ്രഖ്യാപിച്ചിട്ടുണ്ട്‌. ബംഗാൾ ഉൾക്കടലിൽ നിലവിലുള്ള മൂന്നു ചക്രവാതച്ചുഴികൾക്കു പുറമെ തിങ്കളാഴ്‌ച പുതിയ ന്യൂനമർദം രൂപപ്പെടാനും സാധ്യതയുണ്ട്‌.
27 വരെ കേരള- കർണാടക -ലക്ഷദ്വീപ് തീരങ്ങളിൽ മണിക്കൂറിൽ 55 കിലോമീറ്റർവരെ വേഗതയിൽ ശക്തമായ കാറ്റിനും മോശം കാലാവസ്ഥയ്‌ക്കും സാധ്യതയുള്ളതിനാൽ ഇവിടെ മീൻപിടിത്തത്തിന് നിയന്ത്രണമുണ്ടെന്നും കേന്ദ്ര കാലാവസ്ഥ വകുപ്പ്‌ അറിയിച്ചു.
രാത്രി ഗതാഗതം നിരോധിച്ചു
ശക്തമായ മഴ തുടരുന്നതിനാൽ ലാക്കാട് ഗ്യാപ് റോഡിൽ രാത്രി ഗതാഗതം നിരോധിച്ച് ഇടുക്കി കലക്ടർ ഉത്തരവിറക്കി. ദേവികുളം ഇരച്ചിൽപ്പാറ മുതൽ ചിന്നക്കനാൽ വില്ലേജിൽ ചെമ്മണ്ണാർ ഗ്യാപ് റോഡ് ആരംഭിക്കുന്ന ഭാഗം വരെയാണ് വൈകിട്ട് ആറുമുതല്‍ രാവിലെ ആറുവരെ ഗതാഗത നിരോധനം. വൈകിട്ട് ആറുവരെ ഒറ്റവരിയായി വാഹനങ്ങൾക്ക് കടന്നുപോകാം.
