ട്രാക്കിലെ അറ്റകുറ്റപ്പണി: ഇന്ന് 3 ട്രെയിനുകൾ റദ്ദാക്കി, ട്രെയിൻ സമയത്തിലും മാറ്റം

കൊച്ചി: ആലുവ, അങ്കമാലി സെക്ഷനുകളിൽ അറ്റകുറ്റപ്പണിയും മാവേലിക്കരയ്ക്കും ചെങ്ങന്നൂരിനുമിടയിൽ പാലത്തിന്റെ ഗർഡർ മാറ്റിസ്ഥാപിക്കലും നടക്കുന്നതിനാൽ ഇന്ന് 3 ട്രെയിനുകൾ പൂർണ്ണമായും ചിലത് ഭാഗികമായും റദ്ദാക്കി.

ലോകമാന്യ തിലക് ടെർമിനൽ-കൊച്ചുവേളി ഗരീബ് രഥ് എക്സ്‌പ്രസ് (12201 ), നിലമ്പൂർ- കൊച്ചുവേളി രാജ്യറാണി എക്സ്‌പ്രസ് (16350), മധുര-തിരുവനന്തപുരം സെൻട്രൽ അമൃത എക്സ്പ്രസ് (16344 ) എന്നിവയാണ് റദ്ദാക്കിയ ട്രെയിനുകൾ.

ഭാഗികമായി റദ്ദാക്കിയവ

ഇന്ന് രാത്രി 11.15ന് ഗുരുവായൂരിൽ നിന്ന് ചെന്നൈ എഗ്മൂറിലേക്ക് പുറപ്പെടേണ്ട എക്സ്പ്രസ് (16128 ) 23ന് പുലർച്ചെ 1.20ന് എറണാകുളം ജംഗ്‌ഷനിൽ നിന്ന് സർവീസ് ആരംഭിക്കും. ഇന്ന് കണ്ണൂരിൽ നിന്ന് പുറപ്പെടുന്ന എറണാകുളം എക്സ്പ്രസ് (16306 ) തൃശ്ശൂരിൽ സർവീസ് അവസാനിപ്പിക്കും.

സമയ മാറ്റം
ഇന്ന് ഉച്ചയ്ക്ക്ശേഷം 2.25ന് പുറപ്പെടേണ്ട മംഗളൂരു-തിരുവനന്തപുരം എക്സ്പ്രസ് (16348)വൈകിട്ട് 6.40നും വൈകിട്ട് 5.30ന് പുറപ്പെടേണ്ട മംഗളൂരു-തിരുവനന്തപുരം മാവേലി എക്സ്പ്രസ് (16603 ) രാത്രി 7.45നും പുറപ്പെടും.

വലഞ്ഞ് യാത്രക്കാർ

ട്രെയിനുകളുടെ സർവീസ് റദ്ദാക്കിയതും സമയം മാറ്റി​യതും മൂലം ഇന്നലെ യാത്രക്കാർ വലഞ്ഞു. മുൻകൂട്ടി മാദ്ധ്യമങ്ങൾ വഴിയും സോഷ്യൽ മീഡിയ വഴിയും റെയിൽവേ അധികൃതർ ട്രെയിനുകളുടെ നിയന്ത്രണത്തെ കുറിച്ച് അറിയി​ച്ചി​രുന്നെങ്കി​ലും പല സ്റ്റേഷനുകളിലും യാത്രക്കാർക്ക് മണിക്കൂറുകൾ കാത്തിരിക്കേണ്ടിവന്നു. 15 ട്രെയിനുകളാണ് ഇന്നലെ പൂർണ്ണമായും റദ്ദാക്കിയത്.