അട്ടപ്പാടി കോളേജിലെ അധ്യാപകരുടെ രഹസ്യമൊഴി രേഖപ്പെടുത്തും, വിദ്യയുമായുള്ള സംഭാഷണങ്ങളടങ്ങിയ ശബ്ദരേഖ പരിശോധിക്കും

പാലക്കാട് : വ്യാജ രേഖ കേസിൽ  അഗളി പൊലീസ് അട്ടപ്പാടി കോളേജിലെ അധ്യാപകരുടെ രഹസ്യമൊഴി  രേഖപ്പെടുത്തും. ഇന്‍റർവ്യൂ ബോർഡിൽ ഉണ്ടായിരുന്ന അധ്യാപകരുടെ രഹസ്യമൊഴിയാണ് രേഖപ്പെടുത്തുന്നത്.അഗളി സിഐയുടെ നേതൃത്വത്തിൽ ഇന്നും കോളേജിൽ പരിശോധന നടത്തും.

വിദ്യ നൽകിയ രേഖകൾ ഇന്നലെ പൊലീസ് പിടിച്ചെടുത്തിരുന്നു.  സിസിടിവി ദൃശ്യങ്ങളും പൊലീസ് പരിശോധിച്ചു. കേസില്‍ കെ.വിദ്യയുടെ ശബ്ദരേഖ പരിശോധിക്കാനൊരുങ്ങി പോലീസ്. അട്ടപ്പാടി കോളജ് അധികൃതരും വിദ്യയും തമ്മിലുള്ള ഫോണ്‍ സംഭാഷണമാണ് പരിശോധിക്കുക.ജൂണ്‍ രണ്ടിന് അധ്യാപന ജോലിക്ക് വേണ്ടിയുള്ള അഭിമുഖത്തില്‍ പങ്കെടുത്തപ്പോള്‍ വിദ്യ ഹാജരാക്കിയ സര്‍ട്ടിഫിക്കറ്റില്‍ കോളജ് അധികൃതര്‍ക്ക് സംശയം തോന്നിയിരുന്നു.ഇതോടെ വിദ്യയെ ഫോണില്‍ വിളിച്ച് ഇത് വ്യാജ സര്‍ട്ടിഫിക്കറ്റാണോ എന്ന് ചോദിച്ചു.അല്ല എന്നായിരുന്നു വിദ്യയുടെ മറുപടി. ആരാണ് ഇക്കാര്യം പറഞ്ഞതെന്നും വിദ്യ തിരിച്ച് ചോദിച്ചു.

മഹാരാജാസ് കോളജുമായി ബന്ധപ്പെട്ടപ്പോള്‍ ഇക്കാര്യം ബോധ്യമായെന്ന് അധികൃതര്‍ മറുപടി പറഞ്ഞു. എന്നാല്‍ താന്‍ അതൊന്ന് പരിശോധിക്കട്ടെ എന്ന് പറഞ്ഞ് വിദ്യ ഫോണ്‍ കട്ട് ചെയ്‌തെന്നും കോളജ് അധികൃതര്‍ പോലീസിന് മൊഴി നല്‍കി. ഈ സംഭാഷണങ്ങളടങ്ങിയ ശബ്ദരേഖയാണ് പോലീസ് പരിശോധിക്കുക.