പുതിയ പാമ്പൻ റെയിൽപാലം ഉദ്‌ഘാടനം ചെയ്‌തു

ചെന്നൈ : രാജ്യത്തെ ആദ്യത്തെ വെർട്ടിക്കൽ ലിഫ്‌റ്റ്‌ കടൽപാലമായ രാമേശ്വരത്തെ പുതിയ പാമ്പൻ റെയിൽപാലം പ്രധാനമന്ത്രി നരേന്ദ്ര മോദി ഉദ്‌ഘാടനം ചെയ്‌തു. അതോടൊപ്പം തന്നെ പാലത്തിനടിയിലൂടെ കടന്നുപോയ തീരദേശ സേനയുടെ കപ്പലിന്റെ ഫ്‌ളാഗ് ഓഫും പുതിയ രാമേശ്വരം-താംബരം (ചെന്നൈ) ട്രെയിൻ സർവീസിന്റെ ഫ്‌ളാഗ് ഓഫും അദ്ദേഹം നിർവഹിച്ചു.

99 തൂണുകളോടു കൂടിയ പാലത്തിന് 2.08 കിലോമീറ്ററാണ് നീളം. 1914ൽ ബ്രിട്ടീഷുകാർ നിർമിച്ച പഴയ പാമ്പൻ പാലം 2022 ഡിസംബറിൽ ഡികമീഷൻ ചെയ്‌തതോടെയാണ്‌ 535 കോടി രൂപ ചെലവിൽ കൂടുതൽ സുരക്ഷിതവും കടുത്ത സമു​ദ്രസാഹചര്യങ്ങളെയും നേരിടാന്‍ശേഷിയുള്ള പുതിയ പാലം നിർമ്മിച്ചത്‌.