ഇരുപത് വർഷം കൂടി ഇന്ത്യ ഭരിക്കുമെന്ന് നരേന്ദ്രമോദി

ന്യൂഡൽഹി: ഇരുപത് വർഷം കൂടി രാജ്യം ഭരിക്കുമെന്ന് പ്രധാനമന്ത്രി നരേന്ദ്രമോദി. ജനഹിതം അംഗീകരിക്കാന്‍ ചിലര്‍ ഇപ്പോഴും തയാറായിട്ടില്ലെന്നും നന്ദിപ്രമേയത്തിനുള്ള രാജ്യസഭയിലെ മറുപടി പ്രസംഗത്തിൽ പ്രധാനമന്ത്രി പറഞ്ഞു. സത്യം പറയുന്നത് കേള്‍ക്കാനുള്ള മനസുപോലും പ്രതിപക്ഷത്തിനില്ലെന്ന് പ്രധാനമന്ത്രി കുറ്റപ്പെടുത്തി. പ്രതിപക്ഷം സഭയെ അപമാനിക്കുകയാണെന്ന് രാജ്യസഭാ സ്പീക്കർ ജഗദീപ് ധൻകർ പറഞ്ഞു.

മൂന്നാം തവണയും ജനങ്ങൾ എൻ.ഡി.എ സർക്കാരിനെ അധികാരത്തിലേറ്റി. 60 വർഷത്തിന് ശേഷമാണ് ഈ നേട്ടമെന്ന് പ്രധാനമന്ത്രി പറഞ്ഞു. പ്രതിഷേധം അവ​ഗണിച്ച് പ്രധാനമന്ത്രി പ്രസം​ഗം തുടർന്നു. പ്രധാനമന്ത്രിയുടെ പ്രസംഗത്തിനിടെ മുദ്രാവാക്യം വിളിച്ച് പ്രതിഷേധിച്ച പ്രതിപക്ഷം സഭയിൽ നിന്ന് ഇറങ്ങിപോയി. മുൻ സർക്കാരുകൾ “ഓട്ടോപൈലറ്റിലും” “റിമോട്ട് കൺട്രോളിലും” പ്രവർത്തിച്ചിരുന്നതായിര മോദി  വിമർശിച്ചു. “ഓട്ടോപൈലറ്റിലും റിമോട്ട് പൈലറ്റിലും സർക്കാർ പ്രവർത്തിപ്പിക്കുന്ന അത്തരം ആളുകളുണ്ട്, അവർ ജോലിയിൽ വിശ്വസിക്കുന്നില്ല.” ബുധനാഴ്ച രാജ്യസഭയിൽ രാഷ്ട്രപതിയുടെ പ്രസംഗത്തിന് മേലുള്ള നന്ദിപ്രമേയ ചർച്ചയിൽ പങ്കെടുത്ത് പ്രധാനമന്ത്രി മോദി പറഞ്ഞു.

പ്രധാനമന്ത്രിയുടെ ലോക്‌സഭയിലെ പ്രസംഗം പോലെ രാജ്യസഭയിലെ പ്രസംഗത്തിനിടെയിലും മികച്ച പോരാട്ടവീര്യമായിരുന്നു പ്രതിപക്ഷവും കാഴ്ചവെച്ചത്. മുദ്രാവാക്യം മുഴക്കി പ്രതിപക്ഷം സഭയിൽ നിന്നും ഇറങ്ങിപ്പോയി.ചൊവ്വാഴ്‌ച ലോക്‌സഭയിൽ രണ്ടുമണിക്കൂറിലേറെ നീണ്ട പ്രസംഗത്തിൽ, “മണിപ്പൂരിന് നീതി”, “ഭാരത് ജോഡോ” എന്നീ പ്രതിപക്ഷ മുദ്രാവാക്യങ്ങൾക്കിടയിൽ ഹിന്ദുക്കൾ അക്രമാസക്തരാണെന്ന് തെറ്റായി അവകാശപ്പെടാനുള്ള ഗൂഢാലോചനയാണ് കോൺഗ്രസ് നടത്തുന്നതെന്ന് പ്രധാനമന്ത്രി മോദി ആരോപിച്ചു.

കോൺഗ്രസും അതിൻ്റെ മുഴുവൻ ആവാസവ്യവസ്ഥയും ഹിന്ദുത്വത്തെ നിന്ദിക്കാനും ദുരുപയോഗം ചെയ്യാനും അപമാനിക്കാനും ശ്രമിക്കുന്നതായും പ്രധാനമന്ത്രി മോദി ആരോപിച്ചു.”ഹിന്ദുക്കളെ കള്ളക്കേസെടുക്കാൻ ഗൂഢാലോചന നടക്കുന്നു എന്നത് ഗൗരവമുള്ള കാര്യമാണ്. ഹിന്ദുക്കൾ അക്രമികളാണെന്ന് പറഞ്ഞു. ഇതാണോ നിങ്ങളുടെ മൂല്യങ്ങൾ? ഇതാണോ നിങ്ങളുടെ സ്വഭാവം? ഇതാണോ രാജ്യത്തെ ഹിന്ദുക്കളോടുള്ള നിങ്ങളുടെ വെറുപ്പ്?” അദ്ദേഹം പറഞ്ഞു. ബിജെപിയെ കടന്നാക്രമിച്ച് ഹിന്ദുമതത്തെ പരാമർശിച്ച് രാഹുൽ ഗാന്ധി ലോക്‌സഭയിൽ നടത്തിയ പ്രസംഗത്തിന് എതിരായാണ് പ്രധാനമന്ത്രിയുടെ പരാമർശം.