മൂന്നാം ഘട്ടം മൂന്നുമടങ്ങ് ശക്തിയോടെ! രാജ്യം ഭരിക്കാൻ സമവായം ആവശ്യമാണെന്ന് പ്രധാനമന്ത്രി

  ന്യൂഡൽഹി : എംപിമാരെ പാര്‍ലമെന്‍റ് സമ്മേളനത്തിലേക്ക് സ്വാഗതം ചെയ്ത് പ്രധാനമന്ത്രി നരേന്ദ്രമോദി. ഇന്ത്യൻ ജനാധിപത്യത്തിന്‍റെ ചരിത്ര ദിനമാണ് ഇതെന്ന് പ്രധാനമന്ത്രി പറഞ്ഞു. തുടര്‍ച്ചയായി മൂന്നാം തവണ അധികാരത്തിലെത്തുന്നത് 60 വര്‍ഷത്തിന് ശേഷമാണ്. രാജ്യത്തെ നയിക്കാന്‍ എല്ലാവരുടെയും പിന്തുണ വേണമെന്നും പുതിയ ലക്ഷ്യത്തോടെ മുന്നോട്ടുപോകാനാകട്ടെ എന്നും അദ്ദേഹം പ്രത്യാശ പ്രകടിപ്പിച്ചു. 

മൂന്നാം ഘട്ടത്തിൽ മൂന്ന് മടങ്ങ് ശക്തിയോടെയും ഊർജ്ജത്തോടെയും പ്രവർത്തിക്കുമെന്നും പ്രധാനമന്ത്രി കൂട്ടിച്ചേർത്തു. പാർലമെൻ്റിൻ്റെ മാന്യത പ്രതിപക്ഷം പാലിക്കുമെന്നാണ് പ്രതീക്ഷയെന്നും പറഞ്ഞ മോദി തന്‍റെ പ്രസംഗത്തിനിടെ അടിയന്തരാവസ്ഥക്കാലത്തെ കുറിച്ചു ഓർമ്മിച്ചു. ജൂൺ 25 ജനാധിപത്യത്തിനേറ്റ കളങ്കമാണ്. ഭരണഘടനപോലും അന്ന് വിസ്മരിക്കപ്പെട്ടുവെന്നും അദ്ദേഹം കൂട്ടിച്ചേര്‍ത്തു.

‘പതിനെട്ടാം ലോക്‌സഭ പുതിയ പ്രമേയങ്ങളുമായി പ്രവർത്തിക്കും. പുതിയ തീക്ഷ്ണതയും പുതിയ ഉത്സാഹവും പുതിയ ചലനവും കൈവരിക്കാനുള്ള അവസരമാണിത്. ലോകത്തിലെ ഏറ്റവും വലിയ തിരഞ്ഞെടുപ്പ് വളരെ ഗംഭീരവും പ്രതാപത്തോടെയുമാണ് നടന്നത്. നമ്മുടെ രാജ്യത്തെ പൗരന്മാർ തുടർച്ചയായി മൂന്നാം തവണയും ഒരു സർക്കാരിൽ വിശ്വാസമർപ്പിക്കുന്നുവെങ്കിൽ അതിനർത്ഥം അവർ ഗവൺമെൻ്റിൻ്റെ നയങ്ങളും ഉദ്ദേശ്യങ്ങളും അംഗീകരിച്ചുവെന്നാണ്.

നിങ്ങളുടെ പിന്തുണയ്ക്കും വിശ്വാസത്തിനും നന്ദി. സർക്കാരിനെ നയിക്കാൻ ഭൂരിപക്ഷം ആവശ്യമാണ്, എന്നാൽ രാജ്യം ഭരിക്കാൻ സമവായം ആവശ്യമാണ്. ഭരണഘടനയുടെ പവിത്രത കാത്തുസൂക്ഷിച്ച് ഒരുമിച്ച് പ്രവർത്തിച്ച് തീരുമാനങ്ങൾ വേഗത്തിലാക്കാൻ ശ്രമിക്കും’ മോദി പറഞ്ഞു.