തിരുവനന്തപുരം: ഒന്നാം വർഷ ഹയർസെക്കൻഡറി പ്രവേശനത്തിനുള്ള പ്രോസ്പെക്ടസ് പ്രസിദ്ധീകരിച്ചു. 10ാം തരത്തിൽ പരീക്ഷയിൽ ഗ്രേസ് മാർക്ക് ലഭിച്ചവർക്ക് അതേ നേട്ടത്തിന് പ്ലസ് വൺ പ്രവേശനത്തിൽ ബോണസ് പോയന്റ് ഒഴിവാക്കിയാണ് പ്രോസ്പെക്ടസ് അംഗീകരിച്ചത്.
എൻ.സി.സി/ സ്കൗട്ട് ആൻഡ് ഗൈഡ് രാജ്യപുരസ്കാരം, രാഷ്ട്രപതി പുരസ്കാരം നേടിയവർ/ സ്റ്റുഡന്റ് പൊലീസ് കാഡറ്റ്/ ലിറ്റിൽ കൈറ്റ്സ് എ ഗ്രേഡ് ലഭിച്ചവർ എന്നിവർക്ക് ഈ ഇനങ്ങളിൽ ഗ്രേസ് മാർക്ക് ലഭിച്ചിട്ടുണ്ടെങ്കിൽ ബോണസ് പോയന്റ് ലഭിക്കില്ല. കൂടുതൽ ബോണസ് പോയന്റിന് അർഹതയുണ്ടായാൽ പരമാവധി നൽകുന്നത് 10 ആയി നിജപ്പെടുത്തിയിട്ടുണ്ട്. ഓൺലൈൻ അപേക്ഷകൾ ജൂൺ രണ്ടു മുതൽ അഡ്മിഷൻ ഗേറ്റ്വേ ആയ www.admission.dge.kerala.gov.inലെ ‘Click for Higher Secondary Admission’ എന്ന ലിങ്കിലൂടെ ഹയർസെക്കൻഡറി പ്രവേശന പോർട്ടലിൽ പ്രവേശിച്ച് അപേക്ഷ സമർപ്പണം നടത്താം. ജൂൺ ഒമ്പതാണ് അപേക്ഷ സമർപ്പിക്കേണ്ട അവസാന തീയതി.
13ന് ട്രയൽ അലോട്ട്മെന്റും 19ന് ആദ്യ അലോട്ട്മെന്റും നടത്തും. ജൂലൈ ഒന്നിന് മൂന്ന് അലോട്ട്മെന്റ് അടങ്ങിയ മുഖ്യഘട്ട പ്രവേശനം അവസാനിക്കും. ജൂലൈ അഞ്ചിന് ഒന്നാം വർഷ ഹയർസെക്കൻഡറി ക്ലാസുകൾ തുടങ്ങും. ഒഴിവുള്ള സീറ്റുകളിലേക്കുള്ള സപ്ലിമെന്റ് അലോട്ട്മെന്റ് ജൂലൈ 10 മുതൽ ആഗസ്റ്റ് നാലു വരെ നടക്കും. ആഗസ്റ്റ് നാലിന് പ്രവേശന നടപടികൾ അവസാനിപ്പിക്കും.കമ്യൂണിറ്റി ക്വോട്ട സീറ്റുകളിലേക്ക് ജൂൺ 15 മുതൽ സ്കൂളുകൾ അപേക്ഷ വിതരണം ചെയ്യണം. 15 മുതൽ 24 വരെ അപേക്ഷകരുടെ േഡറ്റ എൻട്രി നടത്തണം. സ്കൂളുകൾ റാങ്ക് പട്ടിക ജൂൺ 26ന് പ്രസിദ്ധീകരിക്കുകയും അന്ന് തന്നെ പ്രവേശനം തുടങ്ങുകയും ചെയ്യണം. സപ്ലിമെൻററി ഘട്ടം ജൂലൈ രണ്ടിന് തുടങ്ങും. റാങ്ക് പട്ടിക ജൂലൈ നാലിന് പ്രസിദ്ധീകരിക്കും. ജൂലൈ അഞ്ചിന് പ്രവേശനം തുടങ്ങി ഏഴിന് അവസാനിപ്പിക്കണം. മാനേജ്മെന്റ് ക്വോട്ട സീറ്റുകളിലേക്ക് ജൂൺ 26ന് പ്രവേശനം തുടങ്ങി ജൂലൈ നാലിന് അവസാനിപ്പിക്കണം. അൺഎയ്ഡഡ് ക്വോട്ട പ്രവേശനം ജൂൺ 26ന് തുടങ്ങി ജൂലൈ നാലിന് പൂർത്തിയാക്കണം.