നിപ ഉന്നതതല യോഗം ഇന്ന്; 30 പേരുടെ സാമ്പിൾ കൂടി പരിശോധനക്ക്
ആദിത്യ എൽ വൺ നാലാംഘട്ട ഭ്രമണപഥം ഉയർത്തലും വിജയകരം
September 15, 2023
മലയോര മേഖലകളില്‍ ഒറ്റപ്പെട്ട ശക്തമായ മഴയുണ്ടാകും , ഉയർന്ന തിരമാലയ്ക്കും കടലാക്രമണത്തിനും സാധ്യത
September 15, 2023
കോഴിക്കോട്: നിപാ വൈറസ് രോഗം സംശയിക്കുന്ന 30 പേരുടെ സാമ്പിൾ കൂടി പരിശോധനയ്‌ക്കയച്ചു. ഇതിൽ 15പേരും ആരോഗ്യ പ്രവർത്തകരാണ്‌. ഒരു ഡോക്ടർക്ക്‌ രോഗലക്ഷണമുണ്ട്‌. നിപാ ബാധിതരുടെ സമ്പർക്ക പട്ടികയിലുള്ളവരുടെ എണ്ണം 950 ആയി. ഇതിൽ 287 പേർ ആരോഗ്യ പ്രവർത്തകരാണ്‌. നിപ പ്രതിരോധ പ്രവർത്തനങ്ങൾ വിലയിരുത്താൻ ഉന്നത തല യോഗം ഇന്ന് ചേരും. കേന്ദ്ര സംഘം ഇന്ന് രോഗ ബാധിത പ്രദേശങ്ങൾ സന്ദർശിക്കും.
കഴിഞ്ഞ ദിവസം പരിശോധനയ്‌ക്കായി അയച്ച പതിനൊന്നുപേരുടെയും ഫലം നെഗറ്റീവാണ്‌. സ്വകാര്യ ആശുപത്രികളിൽ നിരീക്ഷണത്തിലുള്ള നാലുപേരടക്കം 213 പേർക്കാണ്‌ അടുത്ത സമ്പർക്കം ഉള്ളത്. മെഡിക്കൽ കോളേജിൽ നിരീക്ഷണത്തിൽ 17പേരുണ്ട്‌. രോഗികളുമായി ഇവർക്ക് സമ്പർക്കമില്ല.എന്നാൽ ഇവർ നിപാ ബാധിതമേഖലയിൽ നിന്നുള്ളവരാണ്‌.ആരോഗ്യമന്ത്രി വീണാ ജോർജും ജില്ലയുടെ ചുമതലയുള്ള മന്ത്രി പി എ മുഹമ്മദ്‌ റിയാസും വ്യാഴാഴ്‌ചയും ഓൺലൈനായി പ്രതിരോധപ്രവർത്തനങ്ങൾ അവലോകനം ചെയ്‌തു.സമ്പര്‍ക്കപ്പട്ടിക മൊബൈല്‍ ലൊക്കേഷനിലൂടെ കണ്ടെത്താന്‍ പൊലീസ് സഹായം തേടാന്‍ മന്ത്രി വീണാ ജോര്‍ജ് നിപ അവലോകന യോഗത്തില്‍ നിര്‍ദേശം നല്‍കി.
കേസുകള്‍ വര്‍ധിച്ചാല്‍ സ്വകാര്യ ആശുപത്രികളില്‍ ഐസൊലേഷന്‍ വാര്‍ഡുകള്‍ സജ്ജമാക്കും. മരുന്നും സുരക്ഷാ സാമഗ്രികളും ഉറപ്പാക്കാൻ കേരള മെഡിക്കൽ സർവീസസ്‌ കോർപറേഷനോട്‌ നിര്‍ദേശിച്ചു. സാമ്പിൾ പരിശോധന വേഗത്തിലാക്കാൻ പുണെ വൈറോളജി ഇൻസ്‌റ്റിറ്റ്യൂട്ടിന്റെയും തിരുവനന്തപുരം രാജീവ്‌ ഗാന്ധി സെന്റർ ഫോർ ബയോ ടെക്‌നോളജിയുടെയും ഓരോ മൊബൈൽ യൂണിറ്റും സജ്ജമാക്കി.
