നസ്രിയ വീണ്ടും നായികയായി മലയാളത്തിലേക്ക്

ഒരിടവേളയ്ക്ക് ശേഷം നസ്രിയ വീണ്ടും നായികയായി മലയാളത്തിലേക്ക്. ബേസില്‍ ജോസഫ് നായകനായി എത്തുന്ന സൂക്ഷ്മദര്‍ശിനി എന്ന ചിത്രത്തിലൂടെയാണ് നസ്രിയയുടെ തിരിച്ചുവരവ്. എംസി ജിതിനാണ് ചിത്രം സംവിധാനം ചെയ്യുന്നത്. സിദ്ധാര്‍ത്ഥ് ഭരതനും ചിത്രത്തില്‍ പ്രധാന വേഷത്തില്‍ എത്തുന്നുണ്ട്. ചിത്രത്തിന്‍റെ ഫസ്റ്റ്ലുക്ക് ബേസില്‍ പുറത്തുവിട്ടിട്ടുണ്ട്.

ട്രാൻസ്, മണിയറയിലെ അശോകൻ, നാനിക്കൊപ്പം ചെയ്ത തെലുങ്ക് ചിത്രം അണ്ടേ സുന്ദരാനികി എന്നീ സിനിമകൾക്കു ശേഷം നസ്രിയ അഭിനയിക്കുന്ന ചിത്രമാണ് സൂക്ഷ്മദര്‍ശിനി. ഗുരുവായൂര്‍ അമ്പലനടയില്‍ എന്ന ഹിറ്റ് ചിത്രത്തിന് ശേഷം ബേസില്‍ പ്രധാന വേഷത്തില്‍ എത്തുന്ന ചിത്രമായിരിക്കും സൂക്ഷ്മദര്‍ശിനി. ചിത്രത്തിന്‍റെ ചിത്രീകരണം ആരംഭിച്ചിട്ടുണ്ട്. 2018 ല്‍ ഇറങ്ങിയ നോണ്‍സന്‍സ് എന്ന ചിത്രത്തിലൂടെ ശ്രദ്ധേയനായ സംവിധായകനാണ് എംസി ജിതിന്‍. സമീര്‍ താഹീര്‍ ഷൈജു ഖാലിദ് എന്നിവരുടെ നിര്‍മ്മാണ കമ്പനിയായ ഹാപ്പി അവേര്‍സ്, എവി അനൂപിന്‍റെ എവിഎ പ്രൊഡക്ഷന്‍സ് എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. ക്രിസ്റ്റോ സേവ്യറാണ് ചിത്രത്തിന്‍റെ സംഗീതം നിര്‍വഹിക്കുന്നത്. ഭ്രമയുഗം, ടര്‍ബോ എന്നീ ചിത്രങ്ങള്‍ക്ക് ശേഷം ക്രിസ്റ്റോ സംഗീതം നല്‍കുന്ന ചിത്രമാണിത്.