ബാങ്കോക്കില്നിന്ന് ലഹരിക്കടത്ത്; മിസ്സിസ് കേരള റണ്ണര് അപ്പ് മുംബൈയില് പിടിയില്
സാങ്കേതിക തകരാര്: ഷാര്ജ- കോഴിക്കോട് എയര് അറേബ്യ വിമാനത്തിന് കൊച്ചിയില് അടിയന്തര ലാന്ഡിങ്
June 13, 2026
നിപ പ്രതിരോധം, ദേവസ്വം സ്പെഷ്യല് പ്ലീഡര് നിയമനം; വിമര്ശിച്ച് പിണറായി
June 13, 2026
മുംബൈ : ബാങ്കോക്കില്നിന്ന് കോടികള് വിലമതിക്കുന്ന മയക്കുമരുന്ന് കടത്താന് ശ്രമിച്ച മുന് മിസ്സിസ് കേരള മത്സരാര്ഥി മുംബൈ വിമാനത്താവളത്തില് പിടിയില്. 2025 മിസ്സിസ് കേരള മത്സരത്തിലെ ഫസ്റ്റ് റണ്ണര് അപ്പായ മാനന്തവാടി പുതുശ്ശേരി സ്വദേശി ഹര്ഷ സണ്ണി (28) ആണ് 11.82 കോടി രൂപയുടെ ഹൈഡ്രോപോണിക് കഞ്ചാവുമായി അറസ്റ്റിലായത്.
ജൂണ് പത്തിന് രാത്രിയില് ബാങ്കോക്കില്നിന്നുള്ള എയര് ഇന്ത്യ വിമാനത്തില് (TG-351) മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തില് എത്തിയതായിരുന്നു ഹര്ഷ. വിമാനത്താവളത്തിലെ പതിവ് നിരീക്ഷണത്തിനിടെ ഇവരുടെ പെരുമാറ്റത്തില് സംശയം തോന്നിയ എയര് ഇന്റലിജന്സ് യൂണിറ്റിലെയും കസ്റ്റംസ് വകുപ്പിലെയും ഉദ്യോഗസ്ഥര് തടഞ്ഞുനിര്ത്തി പരിശോധിക്കുകയായിരുന്നു.
ഹര്ഷയുടെ ട്രോളി ബാഗ് പരിശോധിച്ച ഉദ്യോഗസ്ഥര്, വാക്വം സീല് ചെയ്ത 12 പ്ലാസ്റ്റിക് പാക്കറ്റുകളിലായി സൂക്ഷിച്ച നിലയില് പച്ചനിറത്തിലുള്ള വസ്തു കണ്ടെത്തി. തുടര്ന്ന് നാര്ക്കോട്ടിക് ഡ്രഗ്സ് ആന്ഡ് സൈക്കോട്രോപിക് സബ്സ്റ്റന്സസ് കിറ്റ് ഉപയോഗിച്ച് നടത്തിയ രാസപരിശോധനയില് ഇത് ഹൈഡ്രോപോണിക് കഞ്ചാവാണെന്ന് സ്ഥിരീകരിച്ചു. പിടിച്ചെടുത്ത 11 കിലോയിലധികം തൂക്കം വരുന്ന ഈ മയക്കുമരുന്നിന് അന്താരാഷ്ട്ര വിപണിയില് ഏകദേശം 11.82 കോടി രൂപ വിലമതിക്കും.
എന്ഡിപിഎസ് നിയമപ്രകാരം ഹര്ഷ സണ്ണിയെ കസ്റ്റംസ് അറസ്റ്റ് ചെയ്ത ഹര്ഷ സണ്ണിയെ മുംബൈയിലെ ഫോര്ട്ട് കോടതിയില് ഹാജരാക്കി ജുഡീഷ്യല് കസ്റ്റഡിയില് വിട്ടു. മുംബൈയിലേക്കാണോ അതോ രാജ്യത്തെ മറ്റെതെങ്കിലും ഇടത്തേക്കാണോ ലഹരിമരുന്ന് എത്തിച്ചത് എന്നത് സംബന്ധിച്ച് കസ്റ്റംസ് ഉദ്യോഗസ്ഥരും പൊലീസും അന്വേഷണം തുടങ്ങി. ഇതിനായി ഹര്ഷയുടെ യാത്രാ വിവരങ്ങള്, കോള് റെക്കോര്ഡുകള് തുടങ്ങിയവ പരിശോധിച്ചു വരികയാണ്.
