കന്നി ഐഎസ്എൽ ഷീൽഡ് കിരീടം സ്വന്തമാക്കി മോഹൻ ബ​ഗാൻ

കൊല്‍ക്കത്ത: ഐഎസ്എല്‍ 2023-24 സീസണിലെ ലീഗ് വിന്നേഴ്സ് ഷീല്‍ഡ് മോഹന്‍ ബഗാന്‍ സൂപ്പര്‍ ജയന്റ്‌സിന്. അവസാന ലീഗ് മത്സരത്തില്‍ രണ്ട് തവണ ഷീല്‍ഡ് ജേതാക്കളായ മുംബൈ സിറ്റിയെ ഒന്നിനെതിരെ രണ്ട് ഗോളുകള്‍ക്ക് കീഴടക്കി. കന്നി ലീഗ് വിന്നേഴ്സ് ഷീല്‍ഡ് സ്വന്തമാക്കിയ ബഗാന്‍ എ.എഫ്.സി ചാമ്പ്യന്‍സ് ലീഗ് ഗ്രൂപ്പ് ഘട്ടത്തിലേക്ക് യോഗ്യതയും സ്വന്തമാക്കി.

22 കളിയില്‍നിന്ന് 15 ജയങ്ങളുമായി 48 പോയന്റോടെയാണ് ബഗാന്‍ ഒന്നാം സ്ഥാനത്ത് ഫിനിഷ് ചെയ്തത്. ഷീല്‍ഡ് നിലനിര്‍ത്താന്‍ ഒരു സമനില മാത്രം മതിയായിരുന്ന മുംബൈക്ക് പക്ഷേ അതിന് സാധിച്ചില്ല. 22 കളികളില്‍ നിന്ന് 47 പോയന്റോടെ ടീം രണ്ടാം സ്ഥാനത്തായി. 28-ാം മിനിറ്റില്‍ ലിസ്റ്റണ്‍ കൊളാസോയും 80-ാം മിനിറ്റില്‍ ജാസണ്‍ കമിന്‍സുമാണ് ബഗാനായി സ്‌കോര്‍ ചെയ്തത്. മുംബൈയുടെ ആശ്വാസ ഗോള്‍ 89-ാം മിനിറ്റില്‍ ലാലിയന്‍സുവാല ചാങ്തേ നേടി.

അതേസമയം, ഐഎസ്എൽ പ്ലേ ഓഫ് മത്സരങ്ങൾക്ക് വെള്ളിയാഴ്ച തുടക്കമാകും. ആദ്യ പ്ലേ ഓഫിൽ കേരള ബ്ലാസ്റ്റേഴ്സ്, ഒഡീഷ എഫ്സിയെ നേരിടും. ശനിയാഴ്ച നടക്കുന്ന രണ്ടാമത്തെ പ്ലേ ഓഫിൽ എഫ്സി ​ഗോവ, ചെന്നൈയിൻ എഫ്സിയെ നേരിടും. പ്ലേ ഓഫിൽ വിജയിക്കുന്ന ടീമുകൾ ലീ​ഗിലെ ആദ്യ രണ്ട് സ്ഥാനക്കാരായ മോഹൻ ബ​ഗാനെയും മുംബൈ സിറ്റിയെയും സെമി ഫൈനലിൽ നേരിടും.