‘പുരുഷന്‍മാര്‍ക്കും തുല്യത വേണം’, വനിതാ ദിനത്തില്‍ വിവാദ പോസ്റ്ററുമായി മില്‍മ, ‘അയ്യേ…’ എന്ന് സോഷ്യല്‍മീഡിയ
ലോഡ്ജില്‍ മയക്കുമരുന്നുമായി എത്തി; കണ്ണൂരില്‍ കമിതാക്കള്‍ അറസ്റ്റില്‍
March 8, 2025
മകന്‍റെ ശരീരത്തില്‍ സെല്ലോ ടേപ്പ് കൊണ്ട് എംഡിഎംഎ ഒട്ടിച്ചുവച്ച് വില്‍പ്പന; യുവാവ് പിടിയില്‍
March 8, 2025
കൊച്ചി : വനിതാ ദിനത്തില്‍ സഹകരണ സ്ഥാപനമായ മില്‍മ പങ്കുവച്ച ആശംസയുമായി ബന്ധപ്പെട്ട് വിവാദം. അവകാശങ്ങളിലും സ്വാതന്ത്ര്യത്തിലും സ്ത്രീയേക്കാള്‍ ഒട്ടും താഴെയല്ല പുരുഷന്‍ എന്ന കുറിപ്പിന് ഒപ്പം സോഷ്യല്‍ മീഡിയയില്‍ പങ്കുവച്ച പോസ്റ്റര്‍ ആണ് വിവാദത്തിന്റെ കേന്ദ്ര ബിന്ദു.
ലിംഗ സമത്വം എന്ന ഹാഷ് ടാഗിന് ഒപ്പം സ്ത്രീകള്‍ക്കൊപ്പം പുരുഷന്‍മാര്‍ക്കും തുല്യത വേണം എന്ന ക്യാപ്ഷന്‍ ഉള്‍പ്പെടെയാണ് പോസ്റ്റര്‍. വനിതാ ദിനാശംസകള്‍ പങ്കുവച്ച ഞങ്ങള്‍ പുരുഷദിനം മറക്കില്ലെന്നും പോസ്റ്ററില്‍ വ്യക്തമാക്കുന്നു. വാലും തലയുമില്ലാത്ത തരത്തില്‍ വനിതാദിനാശംസകള്‍ പങ്കുവച്ച മില്‍മയ്‌ക്കെതിരെ വ്യാപക വിമര്‍ശനമാണ് കമന്റ് ബോക്‌സില്‍ ഉള്‍പ്പെടെ ഉയരുന്നത്. വിവാദം ഉണ്ടാക്കി ശ്രദ്ധ നേടാനാണ് മില്‍മ ശ്രമിക്കുന്നത് എന്നും ആളുകള്‍ കുറ്റപ്പെടുത്തുന്നു. ‘അയ്യേ…’ എന്നാണ് മിക്കവരും പോസ്റ്റിന് കീഴില്‍ നല്‍കിയിരിക്കുന്ന കമന്റ്.
വനിതാ ദിനത്തിന്റെ സന്ദേശം പോലും മനസിലാക്കാതെയാണ് മില്‍മയില്‍ നിന്നും ഇത്തരം ഒരു പ്രതികരണം ഉണ്ടായതെന്നും പ്രതികരണങ്ങള്‍ ചൂണ്ടിക്കാട്ടുന്നു. എന്നാല്‍, പുരുഷന്‍മാരെ കുടി പരിഗണിക്കുന്നതാണ് മില്‍മയുടെ സന്ദേശം എന്ന നിലയില്‍ അനുകൂല പ്രതികരണങ്ങളും കമന്റ് ബോക്‌സില്‍ ഇടം പിടിച്ചിട്ടുണ്ട്. പോസ്റ്ററിനെതിരെ വിമര്‍ശനം കടുത്തതിന് പിന്നാലെ ‘ആശംസ’ സോഷ്യല്‍മീഡിയ പേജുകളില്‍ നിന്ന് പിന്‍വലിക്കുകയും ചെയ്തിട്ടുണ്ട്.
എന്നാല്‍, പോസ്റ്ററിന് സമാന നിലപാട് പറയുന്ന വീഡിയോ ഫെയ്സ്ബുക്ക് പേജില്‍ സ്റ്റോറിയായും മില്‍മ പങ്കുവച്ചിട്ടുണ്ട്. വനിതാ ദിനത്തിന് തയ്യാറെടുത്തവര്‍ എന്ന് പറയുന്ന വീഡിയോയില്‍ തുണി കഴുകുകയും, മേശയും മറ്റും വൃത്തിയാക്കുകയും ചെയ്യുന്ന യുവാവിന്റെ വീഡിയോ ക്ലിപ്പാണ് മില്‍മ പങ്കുവച്ചിരിക്കുന്നത്.
