ഇംഫാൽ: മണിപ്പൂർ എക്സൈസ് വകുപ്പ് മന്ത്രി നെംച കിപ്ഗെന്റെ ഔദ്യോഗിക വസതി അക്രമികൾ തീ വച്ച് നശിപ്പിച്ചു. ഇന്നലെ വൈകിട്ടാണ് സംഭവം നടന്നത്.വെസ്റ്റ് ഇംഫാൽ ജില്ലയിലെ ലാംഫെൽ മേഖലയിലുള്ള വസതിയാണ് അക്രമികൾ അഗ്നിക്കിരയാക്കിയത്. സംഭവം നടക്കുമ്പോൾ മന്ത്രി വീട്ടിൽ ഇല്ലായിരുന്നു.
തീപിടിത്തം നടന്നയുടൻ പോലീസ് സ്ഥലത്തെത്തി പ്രതികൾക്കായി തെരച്ചിൽ ആരംഭിച്ചു. അഗ്നിരക്ഷാ യൂണിറ്റുകൾ തീ പൂർണമായും അണച്ചു. കുക്കി വിഭാഗത്തിൽപ്പെട്ട കിപ്ഗെൻ, കാംഗ്പോക്പി മണ്ഡലത്തിൽ നിന്നുള്ള ബിജെപി എംഎൽഎയാണ്. മന്ത്രിസഭയിലെ ഏക വനിതാ അംഗമായ കിപ്ഗെൻ കുക്കികൾക്ക് പ്രത്യേക ഭരണമേഖല ആവശ്യമാണെന്ന നിലപാട് പരസ്യമാക്കിയ വ്യക്തി കൂടിയാണ്.