മലക്കപ്പാറ പൊലീസ് സ്റ്റേഷന് സമീപം പുലിക്കൂട്ടം

തൃശൂര്‍: മലക്കപ്പാറ പൊലീസ് സ്റ്റേഷന് സമീപം മൂന്ന് പുലികള്‍ ഇറങ്ങി. ഇന്നലെ രാത്രി 11.30 ഓടേ പുലിക്കൂട്ടം നടന്നുനീങ്ങുന്നത് സിസിടിവിയില്‍ പതിഞ്ഞിട്ടുണ്ട്.

തേയിലത്തോട്ടത്തിന് സമീപമാണ് മലക്കപ്പാറ പൊലീസ് സ്റ്റേഷന്‍. സ്റ്റേഷന് പിന്‍വശത്തുകൂടി ഒന്നിന് പിറകെ ഒന്നായി മൂന്ന് പുലികള്‍ കടന്നുപോകുന്നതാണ് സിസിടിവി ദൃശ്യങ്ങളിലുള്ളത്. നിരവധി തോട്ടം തൊഴിലാളികള്‍ ഈ പ്രദേശത്ത് താമസിക്കുന്നുണ്ട്. ഓരോ ദിവസവും നിരവധിപ്പേരാണ് പരാതിയുമായി സ്റ്റേഷനില്‍ എത്തിയത്. 

ചാലക്കുടി- വാല്‍പ്പാറ റൂട്ടിലെ മലക്കപ്പാറയില്‍ പുലിക്കൂട്ടം ഇറങ്ങിയത് അറിഞ്ഞ് നാട്ടുകാര്‍ ഭീതിയിലാണ്. പുലികള്‍ കൂട്ടത്തോടെ ഇറങ്ങിയതോടെ പുറത്തേയ്ക്ക് ഇറങ്ങാന്‍ ഭയപ്പെടുകയാണ് നാട്ടുകാര്‍.