വിട്ടുവീഴ്ചക്ക് തയ്യാറാവാതെ പാർട്ടികൾ ; രാജ്യസഭാ സീറ്റിൽ നിർണായക എൽഡിഎഫ് യോഗം ഇന്ന്

തിരുവനന്തപുരം : എൽഡിഎഫിലെ രാജ്യസഭാ സീറ്റ് വിഭജനത്തിൽ അന്തിമ തീരുമാനം ഇന്ന്. വൈകീട്ട് ചേരുന്ന എൽഡിഎഫ് യോഗത്തിൽ തീരുമാനം ഘടകകക്ഷികളെ അറിയിക്കും. ഇന്ന് ചേരുന്ന സിപിഎം സംസ്ഥാന സെക്രട്ടറിയേറ്റ് യോഗവും വിഷയം ചർച്ച ചെയ്യും. നേരത്തെ നടന്ന ഉഭയകക്ഷി ചർച്ചകൾ തീരുമാനമാകാതെ പിരിഞ്ഞിരുന്നു.

ലോക്സഭാ തിരഞ്ഞെടുപ്പ് തോൽവിക്ക് പിന്നാലെ സിപിഎമ്മിന് മുന്നിൽ തലവേദനയായി നിൽക്കുകയാണ് രാജ്യസഭാ സീറ്റ് തർക്കം. എൽഡിഎഫിന് വിജയിക്കാൻ ആകുന്ന രണ്ട് സീറ്റുകളിൽ ഒരു സീറ്റ് സിപിഎം ഏറ്റെടുക്കും. രണ്ടാമത്തെ സീറ്റിനായാണ് സിപിഐ, കേരള കോൺഗ്രസ് എം, ആർ ജെ ഡി, എൻസിപി കക്ഷികൾ രംഗത്ത് എത്തിയത്. ആർജെഡിക്കും എൻസിപിക്കും സീറ്റ് നൽകില്ലെന്ന് സിപിഎം നേരത്തെ അറിയിച്ചിട്ടുണ്ട്.സിപിഐയുമായും കേരള കോൺഗ്രസ് എമ്മുമായും സിപിഐഎം ഉഭയകക്ഷി ചർച്ച നടത്തിയെങ്കിലും വിജയിച്ചിരുന്നില്ല. ഒരുതരത്തിലും വിട്ടുവീഴ്ചയ്ക്ക് തയ്യാറല്ല എന്ന് ഇരുകക്ഷികളും സിപിഎമ്മിനെ അറിയിച്ചു. 

ലോക്സഭയിലേക്ക് കേരളത്തിൽനിന്ന് സിപിഐക്കും കേരള കോൺഗ്രസ് എമ്മിനും ഒരു പ്രതിനിധി പോലുമില്ല. ഈ സാഹചര്യത്തിൽ രാജ്യസഭാ സീറ്റ് വിട്ടുകൊടുക്കാൻ ആകില്ലെന്നാണ് ഇരു പാർട്ടികളുടെയും നിലപാട്. സിപിഎം ഏറ്റെടുക്കാൻ ഉദ്ദേശിക്കുന്ന രാജ്യസഭാ സീറ്റ് വിട്ടുകൊടുത്ത് പ്രശ്നം പരിഹരിക്കുമോ എന്നതും ചർച്ചയിലുണ്ട്.സിപിഎം കേന്ദ്ര നേതൃത്വവുമായി ആശയവിനിമയം നടത്തിയ ശേഷമാകും അന്തിമ തീരുമാനം. സീറ്റ് സിപിഐഎം ഏറ്റെടുക്കുകയാണെങ്കിൽ സ്ഥാനാർത്ഥിയെ ഇന്ന് ചേരുന്ന സംസ്ഥാന സെക്രട്ടറിയേറ്റ് യോഗത്തിൽ തീരുമാനിക്കും. തോമസ് ഐസക്ക്, പുത്തലത്ത് ദിനേശൻ എന്നിവരുടെ പേരുകളാണ് പ്രധാന പരിഗണയിൽ ഉള്ളത്.

ഇന്നലെ രാവിലെ ആയിരുന്നു എകെജി സെൻ്ററിൽ സിപിഎം സിപിഐ ഉഭയകക്ഷി ചർച്ച നടന്നിരുന്നത്. എം വി ഗോവിന്ദനും ബിനോയ് വിശ്വവും ചർച്ചയിൽ പങ്കെടുത്തു.ശനിയാഴ്ച ചേർന്ന സിപിഎം സംസ്ഥാന സെക്രട്ടറിയേറ്റ് യോഗം പ്രശ്നപരിഹാരത്തിനായി സംസ്ഥാന സെക്രട്ടറി എം വി ഗോവിന്ദനെയും മുഖ്യമന്ത്രി പിണറായി വിജയനെയും ചുമതലപ്പെടുത്തിയിരുന്നു. ഇന്ന് ചേരുന്ന എൽഡിഎഫ് യോഗത്തിന് മുൻപ് പ്രശ്നം പരിഹരിക്കാനായിരുന്നു സിപിഎമ്മിൻ്റെ നീക്കം.എല്‍ഡിഎഫിലെ 3 പേരുടെ കാലാവധി ജൂലൈ 1ന് അവസാനിക്കുമ്പോള്‍ രണ്ടു സീറ്റേ മുന്നണിക്കു ലഭിക്കൂ. ജൂണ്‍ 25നാണ് തിരഞ്ഞെടുപ്പ്. സിപിഎം കേന്ദ്ര കമ്മിറ്റിയംഗം എളമരം കരീം, കേരള കോൺഗ്രസ് എം ചെയര്‍മാൻ ജോസ് കെ മാണി, സിപിഐ സംസ്ഥാന സെക്രട്ടറി ബിനോയ് വിശ്വം, എന്നിവരുടെ രാജ്യസഭയിലെ കാലാവധി അവസാനിക്കുന്ന ഒഴിവിലേക്കാണ് തിരഞ്ഞെടുപ്പ് നടക്കുന്നത്.