പത്തനംതിട്ടയില്ല, കേരളാ കോൺഗ്രസിന് കോട്ടയം മാത്രം; എൽഡിഎഫിൽ സീറ്റ് ധാരണയായി

തിരുവനന്തപുരം: കോട്ടയത്തിനു പുറമെ പത്തനംതിട്ടയുമെന്ന കേരളാ കോൺഗ്രസ് മാണി ഗ്രൂപ്പിന്റെ ആവശ്യം അനുവദിക്കാതെ എൽ.ഡിഎഫ് സീറ്റ് ധാരണ. കേരള കോൺഗ്രസ് എമ്മിന് ഒരു സീറ്റ് മാത്രമാണു നൽകിയത്.  സി.പി.എം 15ഉം സി.പി.ഐ നാലും സീറ്റിൽ മത്സരിക്കും. 10നു ചേരുന്ന എൽ.ഡി.എഫ് യോഗത്തിൽ ഔദ്യോഗിക പ്രഖ്യാപനമുണ്ടാകുമെന്നാണു വിവരം.

2019 ൽ  സി.പി.എം 16 സീറ്റുകളിലാണു മത്സരിച്ചത്. ഇത്തവണ ഒരു സീറ്റ് കേരള കോൺഗ്രസ് എമ്മിനു കൈമാറിയിരിക്കുകയാണ്. കഴിഞ്ഞ ലോക്‌സഭാ തെരഞ്ഞെടുപ്പിനുശേഷം നടന്ന നിയമസഭാ തെരഞ്ഞെടുപ്പിനു തൊട്ടുമുൻപായായിരുന്നു കേരള കോൺഗ്രസ് ഇടതു മുന്നണിയ്‌ക്കൊപ്പം ചേർന്നത്. ഇതോടെയാണ് ഒരു സീറ്റ് അവർക്കു നൽകാൻ സി.പി.എം തീരുമാനിച്ചത്.  കേരള കോൺഗ്രസ് രണ്ട് സീറ്റ് ആവശ്യപ്പെട്ടിരുന്നതായി റിപ്പോർട്ടുണ്ടായിരുന്നു. യു.ഡി.എഫിലിരിക്കെ കൈവശംവച്ചിരുന്ന കോട്ടയത്തിനു പുറമെ ഇത്തവണ പത്തനംതിട്ട സീറ്റ് കൂടി ആവശ്യപ്പെടുകയായിരുന്നു. എന്നാൽ, സി.പി.എം നേതൃത്വം അതിനു വഴങ്ങിയിട്ടില്ല. കേരള കോൺഗ്രസ് തീരുമാനം അംഗീകരിച്ചതായും റിപ്പോർട്ടുണ്ട്.