ചേലക്കര, പാലക്കാട് ഉപതിരഞ്ഞെടുപ്പ് : KPCC കേന്ദ്ര തെരഞ്ഞെടുപ്പ് കമ്മിറ്റി യോഗം ഇന്ന്

തിരുവനന്തപുരം : കെപിസിസി കേന്ദ്ര തെര‍ഞ്ഞെടുപ്പ് കമ്മിറ്റിയോ​ഗം ഇന്ന് ചേരും. സ്ഥാനാർഥി നിർണയവുമായി ബന്ധപ്പെട്ട ചർച്ചകൾക്കാണ് യോ​ഗം ചേരുന്നത്. ഷാഫി പറമ്പിൽ എംപി, വി.കെ ശ്രീകണ്ഠൻ എംപി, പാലക്കാട് ഡിസിസി പ്രസിഡൻ്റ് എന്നിവരോട് തിരുവനന്തപുരത്ത് എത്താൻ കെപിസിസി പ്രസിഡൻ്റ് കെ. സുധാകരൻ അറിയിച്ചു.

ഇന്ന് രാവിലെ 11 മണിയോടുകൂടിയായിരിക്കും യോ​ഗം. ചേലക്കര, പാലക്കാട് മണ്ഡലങ്ങളിലെ സ്ഥാനാർഥി നിർണയമാണ് ഇതുവരെ പൂർത്തിയാകാത്തത്. കെപിസിസി നേതൃയോ​ഗം ഇന്നലെ കൊച്ചിയിൽ നടന്നിരുന്നുവെങ്കിലും ഇക്കാര്യം ചർച്ച ചെയ്തിരുന്നില്ല.

പാലക്കാട് സ്ഥാനാർഥി നിർണയവുമായി ബന്ധപ്പെട്ട് തർക്കങ്ങൾ നിലനിൽക്കുന്നുണ്ട്. ഇത് പരിഹരിക്കുകയായിരിക്കും ഇന്നത്തെ പ്രധാന ചർച്ച. സ്ഥാനാർഥി നിർണയം പൂർത്തിയാക്കി അന്തിമ പട്ടിക ഇന്ന് തന്നെ ഹൈക്കമാൻഡിന് അയക്കാനാണ് തീരുമാനം.