മനുഷ്യനാവടാ ആദ്യം, എന്നിട്ടുണ്ടാക്ക് നിലേം വെലേം; ഛേത്രിയെയും ബെംഗളൂരുവനെയും ട്രോളി ബ്ലാസ്‌റ്റേഴ്‌സ്

കൊച്ചി: വാത്സല്യത്തിലെ മമ്മൂട്ടിയുടെ ഡയലോഗിലൂടെ ബെംഗളൂരുവിനെയും സുനില്‍ ഛേത്രിയെയും ട്രോളി ബ്ലാസ്‌റ്റേഴ്‌സ്. കഴിഞ്ഞ വര്‍ഷത്തെ ഐസ്എല്‍ പ്ലേഓഫിനിടെ സുനില്‍ ഛേത്രി നേടിയ വിവാദ ഗോള്‍ കാണിച്ചാണ് മറുപടിയെന്നോണം സിനിമ ഡയലോഗ് വരുന്നത്. സിനിമയില്‍ സിദ്ദീഖിനോട് മമ്മൂട്ടി പറയുന്ന പ്രശസ്തമായ ഡയലോഗാണ് പോസ്റ്റിലുള്ളത്. മനുഷ്യാവടാ ആദ്യം, എന്നിട്ടുണ്ടാക്ക് നിലേം വെലേം, അതും സൂത്രത്തിലുണ്ടാക്കുകയല്ല വേണ്ടത്, സ്വയം ഉണ്ടാവട്ടെ, അതാ കഴിവ് എന്ന ഡയലോഗാണ് പോസ്റ്റിലുള്ളത്. നടന്‍ മുകേഷിന്റെ അന്തസ് വേണമെടാ എന്ന ഡയലോഗും കൂടി പോസ്റ്റിന്റെ അവസാനമെത്തിയതോടെ ബെംഗളൂരുവിന്റെ അണ്ണാക്കിലടിച്ചെന്ന് പറഞ്ഞ് ആരാധകരും രംഗത്തെത്തി.
ഇതിനു മറുപടിയായി ബെംഗളൂരു എഫ്‌സിയും വന്നതോടെ വീണ്ടും ആവേശമായി. കളിയാക്കല്‍ ഇഷ്ടമായെന്നും ശനിയാഴ്ച കാണാമെന്നുമുള്ള മറുപടിയിട്ടതോടെ ബ്ലാസ്‌റ്റേഴ്‌സ് ആരാധകര്‍ അന്തസ് വേണമെടാ എന്ന കമന്റുമായി വീണ്ടുമെത്തി. ഇതോടെ ശനിയാഴ്ച നടക്കുന്ന മത്സരം ആവേശമാകുമെന്നുറപ്പായി. സുനില്‍ ഛേത്രിയുടെ വിവാദ ഗോളിന് പിന്നാലെ ബ്ലാസ്റ്റേഴ്‌സ് കളിക്കളം വിട്ടത് വിവാദമായിരുന്നു. ടീമിനെ തിരിച്ച് വിളിച്ച കോച്ച് ഇവാന്‍ വുക്കമനോവിച്ചിനെതിരെ നടപടിയെടുക്കുകയും ചെയ്തിരുന്നു.

കഴിഞ്ഞ മത്സരത്തില്‍ ഗോവയെ തോല്‍പ്പിച്ച ബ്ലാസ്റ്റേഴ്‌സ് കൂടുതല്‍ ആത്മവിശ്വാസവുമായിട്ടായിരിക്കും ബെംഗളൂരുവിനെതിരെ കളിക്കാനിറങ്ങുക. ബെംഗളൂരുവിന്റെ ഹോം ഗൗണ്ടായ ശ്രീകണ്ഠീരവ സ്‌റ്റേഡിയത്തിലാണ് മത്സരം. സീസണില്‍ ആദ്യ മത്സരത്തില്‍ കൊച്ചിയില്‍ ബ്ലാസ്‌റ്റേഴ്‌സ് ബെംഗളൂരുവിനെ തോല്‍പ്പിച്ചിരുന്നു.