പാലക്കാട്ടെ തോൽവി : സുരേന്ദ്രനെ കൈയൊഴിഞ്ഞ് നേതാക്കളും പ്രവർത്തകരും

തിരുവനന്തപുരം : പാലക്കാട്ടെ തോൽവിയിൽ സംസ്ഥാന അധ്യക്ഷൻ കെ സുരേന്ദ്രനെ ചോദ്യമുനകളിൽ നിർത്തി പ്രവർത്തകർ. ഫേസ്ബുക്കിൽ കെ സുരേന്ദ്രന്റെ പോസ്റ്റുകൾക്ക് താഴെ നിരവധി പേർ കമന്റുകളുമായി രംഗത്തുണ്ട്. “പാർട്ടിയെ നശിപ്പിക്കാതെ ഇറങ്ങി പോയിക്കൂടെ” എന്നാണ് ഒരാൾ ചോദിക്കുന്നത്. മറ്റൊരാളുടെ കമന്റ് ഇങ്ങനെ: “പാലക്കാടുള്ള തോൽവിക്ക് ഒറ്റ കാരണം മാത്രമേയുള്ളു. അത് കൃഷ്ണകുമാറിൻ്റെ ഭാര്യയോടുളള പാർട്ടിക്കാരുടെ എതിർപ്പാണ് അതുകൊണ്ടാണ് ശക്തികേന്ദ്രമായ മുനിസിപ്പാലിറ്റിയിൽ നിന്നും ശക്തമായ വോട്ട് ചോർച്ച ഉണ്ടായത്. കൃഷ്ണകുമാറിന് പകരം സുരേന്ദ്രനോ ശോഭയോ ആയിരുന്നു എങ്കിൽ ഫലം മാറിയേനെ. ബി ജെ പിയുടെ പ്രവർത്തകരുടെ വോട്ടാണ് നഷ്ടപ്പെട്ടത്. അത് മനസ്സിലാക്കി വേണ്ട നടപടി എടുത്തില്ലെങ്കിൽ മുൻസിപ്പാലിറ്റി ഇലക്ഷനും ഇതേ അവസ്ഥ ഉണ്ടാവും.”

അതെസമയം നേതാക്കളും ഉത്തരവാദിത്വം സുരേന്ദ്രനിൽ ഏൽപ്പിച്ച് മാറുകയാണ്. പാലക്കാട്ടെ കനത്ത തെരഞ്ഞെടുപ്പിന്റെ കാരണം കെ സുരേന്ദ്രനോട് ചോദിക്കണമെന്ന് മുൻ കേന്ദ്രമന്ത്രി വി മുരളീധരൻ പ്രസ്താവിച്ചു. പാർട്ടി തന്നെ ഏൽപ്പിച്ചത് മഹാരാഷ്ട്രയിലെ ചുമതലയായിരുന്നുവെന്ന് അദ്ദേഹം പറഞ്ഞു. കേരളത്തിൽ പ്രചാരണത്തിന് പോയതിനപ്പുറം തനിക്കൊന്നും അറിയില്ല. കൂടുതൽ എന്തെങ്കിലും ഉണ്ടെങ്കിൽ സംസ്ഥാന അധ്യക്ഷന്‍ കെ സുരേന്ദ്രനോട് ചോദിക്കണമെന്നും വി മുരളീധരൻ പറഞ്ഞു. സംസ്ഥാനത്ത് എന്തൊക്കെ നടപ്പിലായെന്ന് തനിക്കറിയില്ല.

പാലക്കാട് മുനിസിപ്പാലിറ്റി പരിധിയിൽ എങ്ങനെയാണ് വോട്ട് ചോർന്നതെന്നതാണ് ബിജെപിയെ വലയ്ക്കുന്ന ചോദ്യം. പ്രവർത്തകരുടെ തന്നെ വോട്ടാണ് ചോർന്നിരിക്കുന്നത് എന്നത് സംസ്ഥാനത്തെ ബിജെപി പ്രവർത്തകരെയാകെ പ്രകോപിപ്പിച്ചിട്ടുണ്ട്. “ഉറപ്പായ ഒരു സീറ്റ് നശിപ്പിച്ചു എന്നത് മാത്രമാണ് ഈ ഉപതിരഞ്ഞെടുപ്പിൽ ബിജെപിക്ക് താങ്കളെ കൊണ്ടുണ്ടായ ഗുണം,” എന്നാണ് പ്രവർത്തകരിലൊരാളുടെ കമന്റ്.

ശോഭാ സുരേന്ദ്രനു വേണ്ടിയും ചിലർ കമന്റുകളുമായി രംഗത്തുണ്ട്. ശോഭാ സുരേന്ദ്രനായിരുന്നു മത്സരിച്ചതെങ്കിൽ ജയിച്ചേനെ എന്ന് പറയുന്നവരും, അധ്യക്ഷ സ്ഥാനത്തേക്ക് ശോഭയെ കൊണ്ടു വരണമെന്ന് പറയുന്നവരും രംഗത്തുണ്ട്. കെ സുരേന്ദ്രന്റെ നേതൃത്വം അഴിമതികളുടെ കാര്യത്തിൽ സംസ്ഥാന സർക്കാരുമായി ഒത്തുതീർപ്പ് നടത്തുന്നുവെന്നാണ് കമന്റ് ചെയ്യുന്നവരിൽ പലരും ആരോപിക്കുന്നത്. ലാവ്ലിൻ, സ്വർണക്കടത്ത്, ഡോളർ കടത്ത്, ലൈഫ് മിഷൻ, എക്സാലോജിക്, സിഎംആർഎൽ കേസുകളിലെല്ലാം ബിജെപി നേതൃത്വം സർക്കാരുമായി രാജിയായെന്നും എല്ലാവിഭാഗം നേതാക്കന്മാരെയും ഒന്നിച്ചു കൊണ്ടുപോകാൻ പറ്റുന്ന ശക്തനായ ഒരു നേതാവിന്റെ അഭാവമുണ്ടെന്നും പ്രവർത്തകരുടെ ആരോപണം.