ബിജെപിയുടെ കോട്ട പൊളിച്ച് ജന്‍ സുരാജ് പാര്‍ട്ടി; പ്രശാന്ത് കിഷോറിന് ബിഹാര്‍ ഉപതെരഞ്ഞെടുപ്പില്‍ അട്ടിമറി ജയം

പട്‌ന : ബിഹാര്‍ നിയമസഭാ ഉപതെരഞ്ഞെടുപ്പില്‍ ബിജെപിയുടെ സിറ്റിങ് സീറ്റായ ബങ്കിപ്പൂരില്‍ ജന്‍ സുരാജ് പാര്‍ട്ടി സ്ഥാനാര്‍ഥി പ്രശാന്ത് കിഷോറിന് അട്ടിമറി ജയം. ബിജെപിയുടെ യുവനേതാവ് നീരജ് കുമാറിനെയാണ് പ്രശാന്ത് കിഷോര്‍ പരാജയപ്പെടുത്തിയത്. 19,324 വോട്ടിനാണ് പ്രശാന്ത് കിഷോറിന്റെ ജയം. പാര്‍ട്ടിയുടെ ഉറച്ച കോട്ടയെന്നറിയപ്പെടുന്ന ബങ്കിപ്പൂരിലെ പരാജയം ബിജെപിക്ക് വന്‍ തിരിച്ചടിയായി.

2025ലെ നിയമസഭാ തെരഞ്ഞെടുപ്പില്‍ ബിജെപിയുടെ നിലവിലെ ദേശീയ അധ്യക്ഷന്‍ നിതിന്‍ നബിന്‍ 51,936 വോട്ടിന് വിജയിച്ച മണ്ഡലമാണിത്. വര്‍ഷങ്ങളായി ബിജെപി സ്ഥാനാര്‍ഥികള്‍ മാത്രം വിജയിക്കുന്ന മണ്ഡലമാണ്. നിതിൻ നബിൻ രാജ്യസഭാംഗമാകാൻ രാജിവച്ച ഒഴിവിലേക്കാണ് ഉപതെരഞ്ഞെടുപ്പ് നടന്നത്.

ജന്‍ സുരാജ് സ്ഥാപകന്‍ കൂടിയായ പ്രശാന്ത് കിഷോര്‍ 64,151 വോട്ടുകള്‍ നേടിയപ്പോള്‍ ബിജെപിയുടെ നീരജ് കുമാറിന് 44,827 വോട്ട് നേടാന്‍ മാത്രമേ കഴിഞ്ഞുള്ളൂ. മൂന്നാംസ്ഥാനത്തുള്ള ആര്‍ജെഡിയുടെ രേഖ കുമാരി 14,273 വോട്ട് നേടി.

ജന്‍സുരാജ് പാര്‍ട്ടി രൂപീകരിച്ചതിന് ശേഷം ആദ്യമായാണ് പ്രശാന്ത് കിഷോര്‍ നേരിട്ട് തെരഞ്ഞെടുപ്പ് പോരാട്ടത്തിനിറങ്ങിയത്. 2025ലെ ബിഹാര്‍ നിയമസഭാ തിരഞ്ഞെടുപ്പില്‍ ജന്‍ സുരാജ് പാര്‍ട്ടി ആകെയുള്ള 243 സീറ്റുകളില്‍ 238 സീറ്റിലും മത്സരിച്ചെങ്കിലും ഒരിടത്തും വിജയിക്കാനായിരുന്നില്ല. വെറും മൂന്ന് ശതമാനത്തിലധികം വോട്ടുകള്‍ മാത്രമാണ് അന്ന് ലഭിച്ചത്. പാര്‍ട്ടിയുടെ രാഷ്ട്രീയ നിലനില്‍പ്പ് തന്നെ ചോദ്യചിഹ്നമായിരിക്കെയാണ് ബിജെപി കോട്ടയില്‍ പ്രശാന്ത് കിഷോറിന്റെ വിജയം.

ബങ്കിപ്പൂരിന് പുറമേ ഉപതെരഞ്ഞെടുപ്പ് നടന്ന മധ്യപ്രദേശിലെ ദാതിയ മണ്ഡലത്തിലും ബിജെപിക്ക് തിരിച്ചടിയേറ്റു. കോണ്‍ഗ്രസ് സ്ഥാനാര്‍ഥി ഘനശ്യാം സിങ്ങാണ് ഇവിടെ 6016 വോട്ടിന് ജയിച്ചത്. ബിജെപിയുടെ അശുതോഷ് തിവാരി രണ്ടാമതായി.

ഉപതെരഞ്ഞെടുപ്പ് നടന്ന ഗുജറാത്തിലെ മഞ്ചല്‍പൂരില്‍ ബിജെപി സ്ഥാനാര്‍ഥി വിജയിച്ചു. സതീഷ് പട്ടേലാണ് 30,000ലേറെ വോട്ടിന് കോണ്‍ഗ്രസ് സ്ഥാനാര്‍ഥി ഭിഖാഭായ് റാബറിയെ പരാജയപ്പെടുത്തിയത്.