ഐപിഎൽ മാമാങ്കത്തിന് നാളെ കൊടിയേറും; ആദ്യ മത്സരം ചെന്നൈയും ആർസിബിയും തമ്മിൽ

ചെന്നൈ: വിപണി മൂല്യം കൊണ്ടും താരപ്പകിട്ടു കൊണ്ടും ലോകത്തെ ഏറ്റവും വലിയ ആഭ്യന്തര ട്വന്റി20 ടൂർണമെന്റായ ഇന്ത്യൻ പ്രിമിയർ ലീഗിന് നാളെ തുടക്കം. ഉദ്ഘാടന മത്സരത്തിൽ ചെന്നൈ സൂപ്പർ കിങ്സ് റോയൽ ചലഞ്ചേഴ്സ് ബെം​ഗളൂരുവിനെ നേരിടും. ചെന്നൈയിലെ എം.എ ചിദംബരം സ്റ്റേഡിയത്തിൽ രാത്രി 8 മണിക്കാണ് മത്സരം. 10 ടീമുകളാണ് ഈ സീസണിൽ പരസ്പരം ഏറ്റുമുട്ടുന്നത്.

എ.ആർ.റഹ്മാൻ, സോനു നിഗം എന്നിവർ അവതരിപ്പിക്കുന്ന സംഗീതനിശയോടെയാണു പരിപാടികൾ ആരംഭിക്കുക. ബോളിവുഡ് താരങ്ങളായ അക്ഷയ് കുമാർ, ടൈഗർ ഷ്റോഫ് എന്നിവരുടെ നേതൃത്വത്തിലുള്ള നൃത്തപരിപാടികളും നടക്കും. 8 മണിക്കാണ് ഉദ്ഘാടന മത്സരമെങ്കിലും മറ്റുള്ള ദിവസങ്ങളിൽ വൈകിട്ട് 3.30നും 7.30നുമായിരിക്കും മത്സരം തുടങ്ങുക. സ്റ്റാർ സ്പോർട്സ് ചാനലുകളിലും ജിയോ സിനിമാ ആപ്പിലും തത്സമയം.

പുതിയ സീസണിന് മുന്നോടിയായി ബെംഗളൂരു തങ്ങളുടെ പുതിയ ഗ്രീൻ ജഴ്സി പുറത്തിറക്കി. പരിസ്ഥിതി സംരക്ഷണത്തിന് ഊന്നൽ നൽകുന്ന ‘ഗോ ഗ്രീൻ’ ക്യാംപെയ്നിന്റെ ഭാഗമായാണ് എല്ലാ സീസണിലും ഒരു മത്സരം പച്ച നിറമുള്ള ജഴ്സിയിൽ കളിക്കാൻ ബെംഗളൂരു ടീം തീരുമാനിച്ചത്. സ്റ്റേഡിയത്തിൽ നിന്നും മറ്റും ശേഖരിക്കുന്ന ഖരമാലിന്യം റീസൈക്കിൾ ചെയ്താണ് ഗ്രീൻ ജഴ്സി നിർമിക്കുന്നത്. പച്ചയും കറുപ്പും നിറമുള്ള പഴയ ജഴ്സിക്കു പകരം പച്ചയും കടുംനീല നിറവും ചേർന്ന പുതിയ ജഴ്സിയാണ് ഇന്നലെ അവതരിപ്പിച്ചത്. തങ്ങളുടെ ഒഫീഷ്യൽ ജഴ്സിയും ലോഗോയും ടീമിന്റെ പേരും കഴിഞ്ഞ ദിവസം ബെംഗളൂരു പരിഷ്കരിച്ചിരുന്നു.

പരിക്കേറ്റു ടീമിൽ നിന്ന് പുറത്തായ പേസർ മുഹമ്മദ് ഷമിക്കു പകരക്കാരനായി മലയാളി താരം സന്ദീപ് വാരിയരെ ഗുജറാത്ത് ടൈറ്റൻസ് ടീമിൽ ഉൾപ്പെടുത്തി. പരുക്കേറ്റ ലങ്കൻ പേസർ ദിൽഷൻ മധുഷങ്കയ്ക്കു പകരക്കാരനായി ദക്ഷിണാഫ്രിക്കയുടെ ഇടംകൈ പേസർ ക്വിന മപാകയെ മുംബൈ ഇന്ത്യൻസും ടീമിലെത്തിച്ചു.