വരവറിയിച്ച് എൻഡ്രിക്; ഫ്രാൻസിനെ തോൽപ്പിച്ച് ജർമനി

അന്താരാഷ്ട്ര സൗഹൃദ ഫുട്ബോൾ മത്സരത്തിൽ ബ്രസീലിനും ജർമനിക്കും ജയം. ബ്രസീൽ എതിരില്ലാത്ത ഒരു ​ഗോളിന് ഇം​ഗ്ലണ്ടിനെ തോൽപ്പിച്ചപ്പോൾ ഫ്രാൻസിനെതിരെ രണ്ട് ​ഗോൾ ജയമാണ് ജർമനി സ്വന്തമാക്കിയത്. ബ്രസീലിന് വേണ്ടി 17കാരൻ എൻ‍‍ഡ്രിക്കാണ് ​ഗോൾ നേടിയത്. റയൽ മാ‍‍ഡ്രിഡിൽ പുതിയ സീസണിൽ ചേരാനിരിക്കെയാണ് താരത്തിന് ബ്രസീൽ ടീമിലേക്ക് വിളിയെത്തുന്നത്. ബ്രസീൽ സൂപ്പർ താരം നെയ്മർ ഇല്ലാതെയാണ് കളിക്കാനിറങ്ങിയത്. കാസമിറോ, എഡേഴ്സൺ, തിയാ​ഗോ സിൽവ, മാർക്കിഞ്ഞോസ് തുടങ്ങിയ സീനിയർ താരങ്ങളും ടീമിലുണ്ടായിരുന്നില്ല.

ഈ വർഷം സ്വന്തം നാട്ടിൽ നടക്കുന്ന യൂറോ കപ്പിന് മുന്നോടിയായി ഫ്രാൻസിനെ തോൽപ്പിക്കാൻ കഴിഞ്ഞതിന്റെ ആത്മവിശ്വാസത്തിലാണ് ജർമനി. മോശം ഫോം തുടരുന്നതിനിടെ പരിശീലകൻ ഹാൻസി ഫ്ലിക്കിനെ പുറത്താക്കി ജൂലിയൻ നാ​ഗിൽസ്മാനെ ജർമനി പുതിയ പരിശീലകനായി നിയമിച്ചിരുന്നു. മത്സരത്തിന്റെ ഒന്നാം മിനുട്ടിൽ ഫ്ലോറിയൻ വ്രിട്ട്സും 49ാം മിനുട്ടിൽ കൈയ് ഹാവേർട്ട്സുമാണ് ​ഗോൾ നേടിയത്. വിരമിക്കൽ പിൻവലിച്ച് തിരിച്ചെത്തിയ ടോണി ക്രൂസും ജർമനിയുടെ ആദ്യ ഇലവനിലുണ്ടായിരുന്നു. ആദ്യ ​ഗോളിന് അസിസ്റ്റ് നൽകിയതും ക്രൂസാണ്. എംബാപ്പെ അടക്കമുള്ള സൂപ്പർ താരങ്ങൾ ഫ്രാൻസിനായി കളിക്കാനിറങ്ങിയിരുന്നു.