1982നു ശേഷം ആദ്യം, ഏഷ്യന്‍ ഗെയിംസ് അശ്വാഭ്യാസത്തില്‍ ഇന്ത്യക്ക് സുവര്‍ണ നേട്ടം

ഹാങ്ചൗ: ഏഷ്യന്‍ ഗെയിംസില്‍ മൂന്നാം സ്വര്‍ണം സ്വന്തമാക്കി ഇന്ത്യ. ചരിത്രമെഴുതി ഇക്വേസ്ട്രിയന്‍ (അശ്വാഭ്യാസം) ടീം ഇനത്തിലാണ് ഇന്ത്യയുടെ നേട്ടം. 41 വര്‍ഷത്തിനു ശേഷമാണ് ഇന്ത്യയുടെ നേട്ടം. 1982നു ശേഷം ആദ്യമായാണ് ഇന്ത്യ ഈ ഇനത്തില്‍ വീണ്ടും സ്വര്‍ണം നേടുന്നത്. 

സുദീപ്തി ഹജേല, ഹൃദയ് വിപുല്‍ ചഹ്ദ, അനുഷ് ഗാര്‍വല്ല, ദിവ്യാകൃതി സിങ് എന്നിവരടങ്ങിയ സംഘമാണ് ഡ്രസ്സേജ് ടീം ഇനത്തില്‍ സുവര്‍ണ നേട്ടത്തിലെത്തിയത്. 209.205 പോയിന്റുകളാണ് ഇന്ത്യന്‍ താരങ്ങള്‍ നേടിയത്. ചൈനയ്ക്കാണ് വെള്ളി. 204.882 പോയിന്റുകള്‍ നേടിയാണ് അവര്‍ രണ്ടാമതെത്തിയത്. വെങ്കലം ഹോങ്കോങ് ചൈന വെങ്കലം നേടി. 204.852 പോയിന്റുകളാണ് അവര്‍ നേടിയത്.  അശ്വാഭ്യാസം ഇനത്തില്‍ ഇന്ത്യയുടെ ആകെ ഏഷ്യന്‍ ഗെയിംസ് സ്വര്‍ണ നേട്ടം നാലായി. ഈ ഇനത്തില്‍ നാല് സ്വര്‍മടക്കം 13 മെഡലുകളാണ് ഇന്ത്യ ഇക്കാലത്തിനിടെ സ്വന്തമാക്കിയത്. നാലില്‍ മൂന്ന് അശ്വാഭ്യാസ സ്വര്‍ണ മെഡലുകളും 1982ലെ ഡല്‍ഹി ഏഷ്യന്‍ ഗെയിംസിലാണ് ഇന്ത്യ നേടിയത്.