വിദ്യാർത്ഥിനിയുടെ മരണം : അമൽ ജ്യോതി കോളേജിന് സംരക്ഷണം നൽകാൻ ഹൈക്കോടതി നിർദേശം

കോട്ടയം : കാഞ്ഞിരപ്പള്ളി അമൽ ജ്യോതി കോളേജിന് സംരക്ഷണം നൽകാൻ ഹൈക്കോടതിയുടെ നിർദേശം.തിങ്കളാഴ്ച കോളേജ് തുറക്കുമ്പോൾ ആവശ്യമായ സുരക്ഷ ഉറപ്പാക്കണമെന്ന് പൊലീസിന് നിർദേശം നൽകി. കോളേജ് മാനേജ്മെന്റ് നൽകിയ ഹർജിയിലാണ് കോടതിയുടെ നിർദേശം.

എൻജിനിയറിങ് വിദ്യാർഥിനി ശ്രദ്ധ സതീഷിന്റെ ആത്മ​ഹത്യയെ തുടർന്ന് കോളേജിൽ വിദ്യാർഥികൾ വ്യാപകമായ പ്രതിഷേധം നടത്തിയിരുന്നു. ഇതിനു പിന്നാലെയാണ് പൊലീസ് സംരക്ഷണം ആവശ്യപ്പെട്ട് കോളേജ് അധികൃതർ ഹൈക്കോടതിയെ സമീപിച്ചത്. കോളേജിന്‍റെ പ്രവർത്തനം തടസപ്പെടുത്തുന്നുവെന്നും സംരക്ഷണം വേണമെന്നുമായിരുന്നു ആവശ്യം.