പ്രശസ്ത കന്നഡ ഹാസ്യ നടൻ എംഎസ് ഉമേഷ് അന്തരിച്ചു

ബം​ഗളൂരു : പ്രശസ്ത കന്നഡ നടൻ എം എസ് ഉമേഷ് (80) അന്തരിച്ചു. അർബുദ ബാധിതനായി ഏറെ നാളുകളായി ചികിത്സയിലായിരുന്നു. കഴിഞ്ഞ മാസം വീട്ടിൽ കാൽ വഴുതി വീണതിനെ തുടർന്ന് ആശുപത്രിയിൽ പ്രവേശിപ്പിച്ചിരിക്കുകയായിരുന്നു. കന്നഡ സിനിമയിലെ തന്നെ മികച്ച ഹാസ്യ വേഷങ്ങൾ ചെയ്യുന്ന നടനായിരുന്നു ഉമേഷ്.

തപ്പു തലങ്കൽ, കിലാഡി ജോഡി, മക്കല രാജ്യ, കഥാ സംഗമ, അന്ത, ഗുരു ശിഷ്യരു തുടങ്ങിയ ചിത്രങ്ങളിലെ അദ്ദേഹത്തിന്റെ പ്രകടനം ശ്രദ്ധേയമായിരുന്നു. ആറ് പതിറ്റാണ്ടിലേറെ നീണ്ടു നിന്ന കരിയറിൽ ഏകദേശം 400-ലധികം സിനിമകളിൽ അഭിനയിച്ചിട്ടുണ്ട്.

രാഷ്ട്രീയ നേതാക്കളും ചലച്ചിത്ര പ്രവർത്തകരുമടക്കം നിരവധി പേരാണ് അദ്ദേഹത്തിന് ആദരാഞ്ജലി അർപ്പിച്ച് രം​ഗത്തെത്തിയിരിക്കുന്നത്. ബി ആർ പന്തുലുവിന്റെ മക്കള രാജ്യ എന്ന ചിത്രത്തിലൂടെ ബാലതാരമായാണ് ഉമേഷ് സിനിമാ ലോകത്തേക്ക് കടക്കുന്നത്.