എറണാകുളം- ബംഗളൂരു വന്ദേഭാരത് എക്‌സ്പ്രസ് ഓണ്‍ലൈനായി ഫ്‌ലാഗ് ഓഫ് ചെയ്ത് പ്രധാനമന്ത്രി

കൊച്ചി: എറണാകുളം കെഎസ്ആര്‍ ബംഗളൂരു വന്ദേഭാരത് എക്‌സ്പ്രസ് ട്രെയിന്‍ പ്രധാനമന്ത്രി നരേന്ദ്ര മോദി ഓണ്‍ലൈനായി ഫ്‌ലാഗ് ഓഫ് ചെയ്തു. ഗവര്‍ണര്‍ രാജേന്ദ്ര ആര്‍ലേക്കര്‍, കേന്ദ്ര മന്ത്രിമാരായ ജോര്‍ജ് കുര്യന്‍, സുരേഷ് ഗോപി എന്നിവര്‍ ചടങ്ങില്‍ പങ്കെടുത്തു. ഉദ്ഘാടന സ്‌പെഷല്‍ ട്രെയിന്‍ രാവിലെ 8.50 നു പുറപ്പെട്ടു. വൈകീട്ട് 5.50നു ബംഗളൂരുവിലെത്തും. സുരേഷ് ഗോപി തൃശൂര്‍ വരെ ട്രെയിനില്‍ യാത്ര ചെയ്തു.

ചൊവ്വാഴ്ച മുതല്‍ ഔദ്യോഗികമായി സര്‍വീസ് ആരംഭിക്കുന്ന എറണാകുളം- കെഎസ്ആര്‍ ബംഗളൂരു വന്ദേഭാരത് എക്‌സ്പ്രസ് ട്രെയിനിന്റെ വിവിധ സ്റ്റേഷനുകളിലേക്കുള്ള നിരക്ക് പുറത്തുവിട്ട് റെയില്‍വേ. എറണാകുളത്ത് നിന്ന് കെഎസ്ആര്‍ ബംഗളൂരു വരെയും തിരിച്ചും ചെയര്‍കാറിന് 1095 രൂപയും എക്‌സിക്യൂട്ടീവ് ചെയര്‍ കാറിന് 2289 രൂപയുമാണ് ടിക്കറ്റ് നിരക്ക്.

എറണാകുളത്ത് നിന്ന് ബംഗളൂരുവിലേക്ക് പോകുമ്പോള്‍- തൃശൂര്‍ 293 (എക്‌സിക്യൂട്ടീവ് ചെയര്‍ കാര്‍- 616), പാലക്കാട്- 384 (809), കോയമ്പത്തൂര്‍-472 (991), തിരുപ്പൂര്‍- 550 (1152), ഈറോഡ്- 617 (1296), സേലം-706 (1470), കെആര്‍ പുരം- 1079 (2257) എന്നിങ്ങനെയാണ് മറ്റു സ്‌റ്റേഷനുകളിലേക്കുള്ള ടിക്കറ്റ് നിരക്ക്.

ബംഗളൂരുവില്‍ നിന്ന് എറണാകുളത്തേയ്ക്ക് പോകുമ്പോള്‍- സേലം- 566 രൂപ (എക്‌സിക്യൂട്ടീവ് ചെയര്‍ കാര്‍-1182), ഈറോഡ്- 665 (1383), തിരുപ്പൂര്‍-736 (1534), കോയമ്പത്തൂര്‍- 806 (1681), പാലക്കാട് -876 (1827), തൃശൂര്‍-1009 (2110) എന്നിങ്ങനെയാണ് മറ്റു സ്‌റ്റേഷനുകളിലേക്കുള്ള ടിക്കറ്റ് നിരക്ക്.